په خواله رسنیو کې د اګسټ ۱۵ په بېلابېلو نومونو یاده شوې 

د ۲۰۲۱ زېږدیز کال د اګسټ میاشتې ۱۵ مه  د افغانستان اسلامي جمهوریت سقوط وکړ او اسلامي امارت واک ته ورسېد. 

مخکېنی ولسمشرمحمد اشرف غني  او لوړ پوړي چارواکي له هېواده ووتل، د اسلامي امارت چارواکي او سرتېري بیا کابل ته ننوتل او ماښام ناوخته یې پر ولسمشرۍ ماڼۍ خپله ولکه ټینګه کړه.

خواله رسنیو کې د اوسنیو او مخکنیو چارواکو اندونه او احساسات د دغې ورځې په اړه مخالف دي.

د افغانستان اسلامي امارت ویاند ذبیح الله مجاهد، دیوه انځور په خپرولو د اګسټ پنځلسمه د حق د بریا ورځ یاده کړې. 

مجاهد وايي:«پر باطل د حق د بریا ورځ دې ټولو دین پالونکو افغانانو ته مبارک وي.» 

په خواله رسنیو کې د افغانستان اسلامي امارت پلوه فعالانو دا ورځ د خپلواکۍ ورځ بللې ده.

د اسلامي امارت یو تن پلوی:« نن د اګسټ  ۱۵ مه، د امریکا او د هغوی د همکارانو د اشغال پر وړاندې د اسلامي امارت د بریا ورځ ده.» 

د مخکيني ولسمشر محمد اشرف غني لومړي مرستیال او د جمهوریت چارواکو د اګسټ ۱۵ مه یا د زمري ۲۴مه  بیا  توره ورځ یاده کړې.

د مخکېني ولسمشر مرستیال امرالله صالح وايي:« د زمري ۲۴مه زموږ په کایزه کې تور ټکی دی، له دې اسارته وتل حتمي دي.» 

د مخکېني حکومت د ملي دفاع وزارت مرستیال شاه محمد مېاخېل بیا وايي:«د اګسټ ۱۵  مه  د افغانستان معاصر تاریخ تر ټولو توره ورځ ده.» 

فعالان د اګسټ پنځلسمه توره او سپینه ورځ بولي، په خواله رسنیو کې پرې د جمهوریت او اسلامي امارت پلویان په تودو بحثونو بوخت دي، خو ډېری نور بیا د افغانستان له نامالوم راتلونکې نه پوهیږي،چې رښتیا هم افغانستان کومې خواته روان دی.