د هېواد یو شمیر پخوانیو سیاسي ګوندونو،جمیعت اسلامي،جنش اسلامي او وحدت اسلامي مشرانو او غړو،چې له افغانستانه بهر اوسیږي،په یوه انلاین ناسته کې د مقاومت په نوم شورا اعلان او د اسلامي امارت پرضد یې پر جګړه او مقاومت ټینګار وکړ.
کارپوهان وايي،د دغو پخوانیو څیرو دغه مجمع د پردیو لپاره کار کوي،چې په تیرو ۴۰ کلونو کې یې ولس ته خپل امتحان ورکړی او نور د باور وړ نه دي.
دوی وايي،ولس باید د داسې حرکتونو پر وړاندې ودریږي او له اوسني نظام ملاتړ وکړي.
د سیاسي چارو کارپوه حکمت الله حکمت وايي:« د مقاومت جبهې ترنامه لاندې،چې کومه مجموعه موږ او تاسو ولیده،دا د جاسوسانو،خاینانو غلو،جنګ غوښتونکو او فاسدینو هغه مجموعه ده،چې د تیرو څلور لسیزو راهیسې دا ملت د دوی له لاسه کړیږي،ملت باید د دوی پروړاندې ودریږي او له اوسني نظام ملاتړ وکړي.»
ځینې په دې باور دي،چې د دغو څیرو خبرې او نظرونه کوم ځای نه نیسي او نه کومه پایله ورکوي.
سیاسي فعاله ډیوه پتنګ وايي:« دوی افغان ولس ته خپل امتحان ورکړی دی،اوس ولس د دوی نظرونو او تګلارو ته ارزښت نه ورکوي او د دوی دغسې ناستې او نظرونه کوم ځای هم نه نیسي.»
د تیر حکومت ځینې چارواکي هم د مقاومت شورا په نوم له حرکت سره مخالف دي او وايي، د افرصت طلبه څیرې دي،چې غواړي یو ځل بیا افغانستان او نظام ته سرخوږی جوړ کړي.
د کورنیوچارو پخوانی وزیر عمر داوود زی وايي:«دوی په نورو ملکونو کې ښه او اشرافي ژوند لري او بل فرصت ته منتظر دي،چې بیا ولس، افغانستان او نظام ته درد سر جوړ کړي.»
مخکینی ولسمشر محمد اشرف غني هم پردې ټینګار لري،چې دمقاومت په نوم له حرکت نه ملاتړ کوي او نه یې هم مخالف دی،خو افغان ولس دې پوه شوي،چې دوی پر سمه لار روان نه دی.
غني زیاته کړې:« زه نه ترې دفاع کوم او نه یې غندم او پر خلکو غږ کوم،چې دغه کسان چې په کومې لارې روان دي،دا لار سمه نه ده.»
یو کال کیږي،چې دغه څیرې بهرنیو هېوادونو ته تښتیدلي دي او په همدې موده کې د اوسني نظام پر وړاندې د وسله وال مقاومت غږونه کوي،خو د ولسونو له لوري ځواب نه دی ورکړل شوی.
کتوونکي په دې باور دي،چې دغه کسان د سیمې او نړۍ ځینې استخباراتي کړیو له لوري جګړې ته هڅول کیږي.
