امریکا افغانستان څخه له وتلو وروسته وویل،دوی به افغانستان له سیمې څاري،چې په دې تړاو پاکستان او یو شمېر خلیج هېوادونو سره د اډو د ورکړې،پرسر راپورونه هم خپاره شول.
عراق او افغانستان کې د امریکا دغه پاتې شوي جنرال افغانستان کې د امریکا ښکیلتیا له امکان لرې کار نه دی بللی،خو کارپوهان بیا وایي،امریکا افغانستان کې ستراتیژیکه ماتې خوړلې او بیا راتګ یې افغانستان ته باوري نه دی.
د سیاسي چارو کارپوه کامران امان وايي:« د امریکا خلک په مجموع کې د افغانستان په تجاوز پښېمانه دي او امریکا چې کوم نظامي او سیاسي ارزښت درلود،هغه یې په نړۍ کې له لاسه ورکړی دی. زه فکر نه کوم امریکا دې بیا افغانستان کې ځانونه ښکیل کړي. امریکایانو خپل دوستان له لاسه ورکړي،هوکړو باندې ولاړ نه دي،اوکراین کې په انزوا کې دي او ژر به په چین کې هم شي.»
د سیاسي چارو کارپوه توریالی ځاځی بیا په دې اند دی،چې امریکا نه غواړي،په هېڅ صورت افغانستان د چین او روسیې تر تاثیر لاندې راشي.
هغه زیاته کړه:«امریکا په هېڅ صورت نه غواړي،چې پر افغانستان خپل کنټرول له لاسه ورکړي او دا هم نه مني،چې افغانستان د چین او روسیې تر اغیز لاندې راشي.پردۍ جګړه په پردۍ ځمکه موږ د پردیو د سیاسي اهدافو قرباني شو. دوی چې وایي،امریکایان د اګسټ په ۱۵ مه له افغانستانه ووتل،دروغ وایي،اوس هم چې دوی وغواړي،په هروخت کې برید کولای شي،لکه د القاعدې شبکې مشر ایمن الظواهري وژل.»
د حزب اسلامي مشر ګلبدین حکمتیار هم د تېرې جمعې پر ورځ وویل،امریکا افغانستان کې خپله جګړه نه ده پریښي،خو اسلامي امارت بیا بار بار ویلي،دوی خپله خاوره د چا پرضد نه استعمال کوي او نور هېوادونه هم باید دا کار وکړي.
کابل کې د امریکا ډرون برید د افغانستان ملي حاکمیت ننګولی دی او پر اسلامي امارت یې ولسي فشار زیات کړی دی، اسلاميامارت پر افغان خاوره د امریکا ډرون برید غندلی، د دوحې له تړونه یې سرغړونه بللې او په اړه یې څيړنې پيل کړي دي.
