اسلاماباد: د امریکا او طالبانو ترمنځ خبرو ته پاکستان زمینه مساعده کړې ده.
اسلام اباد یو ځل بیا د افغان سولې لپاره د امریکا د ځانګړي استازي زلمي خلیل زاد کوربه دی.
خلیل زاد په یو داسې وخت کې پاکستاني چارواکو سره د خبرو لپاره اسلام اباد ته تللی، چې دا مهال د طالبانو او امریکا ترمنځ خبرې درېدلې دي.
تحلیل کوونکي باور لري که پاکستان سولې ته لومړیتوب ور نه کړي افغانستان کې به یوه بله بې رحمه جګړه پیل شي.
په سیمه کې رامنځته شوي شرایط د پاکستان په ګته یادېږي او انديښنه شته چې دا هېواد به د افغان سولې پر سر بیا هم له امریکا امتیاز واخلي.
اسلام اباد ته د زلمي خلیلزاد په رسېدو سره د لومړي وزیر دفتر ویلي، دوی د افغان سولې په برخه کې د طالبانو او امریکایانو ترمنځ خبرو لپاره زمینه برابره کړې ده.
له دې سره یو ځای ارګ عمران خان ته بلنه ورکړې او هغه منلي چې کابل ته راشي.
د پاکستان دبهرنیو چارو وزارت ویلي، هېواد یې د طالبانو او امریکا ترمنځ خبرو کې مهم رول لوبولی دی او دغو خبرو ته پاکستان زمینه مساعده کړې ده.
د پاکستان د بهرنیو چارو وزارت داسې ویلي (( پاکستان د افغان سولې په برخه کې خپله ونډه لوبوي چې د طالبانو او امریکایانو د خبرو لپاره زمینه هم اسلام اباد برابره کړې. پاکستان په افغانستان کې د سولې د ټینګښت ملاتړ کوي.))
د خلیلزاد له سفر سره یو ځای افغان ولسمشر د پآکستان له لومړي وزیر عمران خان سره ټلفوني خبرې کړي، هغه ته یې بلنه ورکړې او منلې یې ده چې کابل ته راشي.
اوس د پاکستان له اړخه د دې تمه نه کېږي چې دغه هېواد دې د جګړې او سولې په دوو انتخابونو کې په ثبات ګوته کېږدي.
د پوځي چارو شنونکی عتیق الله امرخېل یې لامل دا بولي چې پاکستان افغانستان کې خپلو موخو ته لا نه دی رسېدلی چې د جګړې پر ځای د سولې ملاتړ وکړي.
افغانستان ته د امریکا له راتګ سره د واشنګټن او اسلام اباد ترمنځ ګټې ستراتیژیکې نه وې خو پاکستان په دې اوږده موده کې له تکتیکي تعامل څخه ګټه اخیستې چې اوس په سیمه کې نوي شرایط د پاکستان په ګته بلل کیږي.
افغان حکومت هم کار کوي چې د سیمې هېوادونو همکاري راجلب کړي او په همدې موخه د ملي امنیت شورا سلاکار حمدالله محب هند ،چین او سعودي عربستان ته تازه سفرونه وکړل.
