په خوست کې د خصوصي پانګونې په مرسته د لومړي ځل لپاره د ودونو د یوه عصري او مجهز تالار د جوړېدو چارې پیل شوې.
دغه تالار چې د ۱۱۳ میلیونه افغانیو په لګښت پر پنځه جرېبه ځمکه جوړېږي، تمه ده چارې یې په راتلونکي یوه نیم کال کې بشپړې شي.
پانګوال وايي، موخه یې په خپل هېواد کې د پانګه اچونې ترڅنګ د خلکو د اړتیاوو پوره کول او د بنسټیزو اسانتیاوو رامنځته کول دي.
ملي پانګوال، حاجي کریمالله صدیقي وايي: « د خوست ولایت اکثریت پانګوال په خلیج کې اوسېږي. موږ له ټولو توقع لرو چې خپل هېواد ته راشي او دلته آبادي وکړي.»
د خوست کرنې او مالدارۍ رییس، شېر محمد ذبیح وايي: « دلته تر اوسه په دې برخه کې داسې ګام نه و اوچت شوی چې د خوست خلکو ستونزې هوارې کړي. اوس به دا زمینه هم په لنډ وخت کې برابره شي.»
بله خوا، د خوست اوسېدونکي وایي، په دې ولایت کې د معیاري او مجهزو تالارونو نه شتوالي له امله خلک د ودونو او نورو مراسمو ترسره کولو پر مهال، له ګڼو ستونزو سره مخ وي.
دوی د دې تالار جوړېدل د خلکو د اړتیاوو پوره کولو لپاره یو مهم ګام ګڼي او له نورو ملي پانګوالو هم غواړي چې په هېواد کې پانګونې ته مخه کړي، ترڅو ټولنې ته د اړتیاوو وړ اسانتیاوو ترڅنګ، خلکو ته د نویو کاري فرصتونو زمینه هم برابره شي.
د خوست اوسېدونکی مظلوم یار صبری وايي: « په خوست کې دا ډول تالار نه شته، نو ځکه ورته ډېره اړتیا ده. په نورو پانګوالو هم غږ کوو چې خوست کې په مختلفو برخو کې پانګونه وکړي.»
د خوست اوسېدونکی عید مرجان وايي: « موږ له افغان شرکتونو غوښتنه کوو چې په افغانستان او په ځانګړې توګه خوست کې پانګونه وکړي او د خوست خلکو ته ښه خدمات وړاندې کړي.»
د خوست اوسېدونکی ډاکټر سمیعالله مشال وايي: « زه ډېر خوښ یم چې په خوست کې دا ډول لویې پروژې پیل کېږي، دا د خوست لپاره ښکلا او د خلکو لپاره سالمه بوختیا ده. په دې سره به د خوست خلکو اړتیاوې هم پوره شي.»
خوست کې د ودونو د یاد تالار په جوړېدو سره، تمه ده چې د خصوصي پانګونې د پراختیا په برخه کې د دې ولایت په کچه مثبت تحول رامنځته شي او ورسره به د سیمه ییز اقتصاد له پیاوړتیا سربیره، په اړینو برخو کې د دې ولایت د اوسېدونکو ستونزې هم هوارې شي.
