کابل کې د روغتیا دویم ملي او نړیوال نندارتون پرانیست غونډې ته دعامې روغتیا وزارت ترڅنګ، دحکومت نور چارواکي هم راغلي.
د عامې روغتیا وزارت د خوړو او درملو معین، د باکیفیته درملو پر تولید او واردولو د ټینګار ترڅنګ، خبرداری ورکوي هغه شرکتونه چې بې کیفیته درمل وارد یا تولید کړي او یا یې هم په غیر قانوني توګه هېواد ته راوړي، له سخت قانوني چلند سره به مخ شي.
حمد الله زاهد وايي: « ټولو متقلبینو ته که هغوی د هېواد په داخل کې وي یا هم له بهرنیانو سره اړیکه لري، که وارداتي درمل وي یا تولیدي، یو ځل بیا خبرداری ورکوو چې که چېرې خپلو مخفي او تقلبي اعمالو ته ادامه ورکړي، قانون به در باندې عملي کېږي او زندان ته به لېږدول کېږئ. زموږ غوښتنه ده چې له تقلبي تولید، تورید او د جعلي اسنادو له وړاندې کولو څخه ډډه وکړئ.»
په ورته مهال، د اقتصاد وزارت چارواکي دا ډول نندارتونونه په روغتیايي برخه کې د پانګونې جلبولو لپاره مهم یادوي او وايي، له دې ډول نندارتونونو سره کورني تولیدات هم وده کوي.
قاري دین محمد حنیف له خلکو وغوښتل چې د کورنیو تولیداتو څخه په ګټه اخیستې سره، له دغو تولیداتو ملاتړ وکړي.
د اقتصاد وزیر وايي: « باور لرم چې دغه فرصت د اړیکو پراخولو ، پانګونې جذبولو او ډېرو ستونزو ته د حل لارو موندلو لپاره بستر جوړوي.»
په ورته مهال، د چارو ادارې مشر بیا وايي، له دې وړاندې به هېواد ډېری درمل له نورو هېوادونو وارېدېدل، خو اوس دا کچه د اسلامي امارت د جدي پاملرنې په پایله کې راټیټه شوې.
د چارو ادارې مشر نورالحق انور وايي: « پخوا په دې اړه سیالي کېده چې یو سوداګر ډېرې پیسې وګټي او دا د بې کیفیته درملو په واردولو کېده. دغو درملو نه یوازې زموږ د ناروغانو په رغولو کې کوم اثر نه درلود بلکې نورې ناروغۍ یې هم را پیدا کولې. اوس د با کیفیته درملو د تولید او تورید لپاره طرزالمعل جوړ شوی او د هغو کسانو لپاره سزاګانې په پام کې نیول شوې دي چې جعل او تقلب کوي.»
د نندارتون ګډونوال بیا د کورنیو تولیداتو د ودې او دځان بسیاینې لپاره د دې ډول نندارتونونو جوړېدل ارزښتناک ګڼي.
د طبي نندارتون یو تن ګډونوال وايي: « دا نندارتون د کورنیو شرکتونو لپاره ډېر ښه دی. همدارنګه خلک د افغانستان جوړ درمل خوښوي او ډاکټران هم همکاري کوي. په دې ډول نندارتونو کې ډاکټران، روغتونونه او کمپنۍ سره معرفي کېږي، بیا زموږ د درملو نمونې او بېلګې له ځانه سره وړي او ناروغانو ته یې تجویز کوي.»
د نندارتون یوبل ګډونوال وايي: « دا ډول پروګرامونه د ټولو هېوادوالو، سوداګرو او هغو کسانو لپاره په خصوصي سکټور کې پانګونه کوي، ډېر اړین او ګټور دي. د دې هدف دا دی چې دلته په یوه ځای کې شته امکانات تر نورو ځایونو هم ورسول شي.»
یوبل ګډونوال وايي: « په ټوله کې دا ډول نندارتونونه فرصتونه برابروي چې په کې زموږ داخلي تولیدات معرفي شي او عام خلک ورسره آشنا شي.»
چارواکي له پانګوالو غواړي چې د نورو برخو ترڅنګ، افغانستان د روغتیايي وسایلو او درملو د تولید په برخه کې هم دپانګوونې لپاره ښه ظرفیتونه لري او کولی شي چې په دې برخه کې پانګونه وکړي.
د اقتصاد وزارت د معلوماتو له مخې، یوازې په تېر ۲۰۲۵ کال کې د ۲۶۳ میلیونو ډالرو په ارزښت درمل او د ۲۷ میلیونو ډالرو په ارزښت طبي تجهزات او روغتیايي وسایل هېواد ته راوارد شوي دي.
