Skip to content
د کابل په زړه کې د القاعدې شبکې د مشر ایمن الظواهري وژل کېدل د اوس لپاره یوه داسې معما ده،لکه په ۲۰۱۱ م کال کې چې د دې شبکې مشر اسامه بن لادن د اسلام اباد په یوه خوندي سیمه ایبټ اباد کې د امریکايي ځواکونو لخوا ووژل شو.
د سیاسي چارو کارپوهان وايي،د اوس لپاره کابل کې د ایمن الظواهري وژل کېدو د نړیوالو هغه اندېښنې پرځای ثابتې کړې،چې باور یې درلود،چې اسلامي امارت القاعده او نورو هغو وسله والو ډلو سره اړیکې لري،چې راتلونکې کې نړۍ ته زیان اړوي.
دوی وايي،د اسلامي امارت په خپلو ژمنو کې ریښتیني ثابت نه شول او اوس به له نړیوالو سره تعامل لا ډېر سخت شي.
د باور غورځنګ مشر نجیب ازاد وايي:« دا به د طالبانو رسمیت پېژندنې پر وړاندې خنډونه لا ډېر کړي. نو له دې سره به د سیمې هغه هېوادونو،چې په دې وروستیو کې یې د چین، ازبکستان او تاجکستان په ګډون، له طالبانو سره یې د ځینو تعاملاتو رامنځته کولو لپاره هڅې کولې یا یې اقتصادي راکړه ورکړه پيل کوله،هغه به هم اوس قطعه شي، ځکه نړیوال فشارونه دي،چې دلته د نړۍ تر ټولو لوی ترهګر وژل شوی دی. نو د طالبانو رسمیت پېژندنه او له دوی سره د نړیوالو تعامل به لا ډېر له خنډ سره مخ شي او د طالبانو واکمني به له جدي ګواښ سره مخ شي.»
د ایمن الظواهري وژل کېدو پر اسلامي امارت باندې نړیوالې نیوکې زیاتې کړي دي،چې د دوی نړیوال باور یې زیانمن کړی دی.
دا پوښتنې حل شوي نه دي،چې ایمن الظواهري څنګه او څه وخت افغانستان ته راغلی و، امریکا څنګه په نښه کړ او په دې عملیاتو کې د امریکا له متحده ایالتو سره چا او کومو خلکو مرسته کړې ده. خو په ظاهره هرڅه د طالبانو په خلاف دي.
د سیاسي چارو کارپوه واحد فقیري وايي، په دې اساسو شیبو کې،چې اسلامي امارت غواړي،نړیوال مشروعت ترلاسه کړي،ټولې هلې ځلې ننګولی شي.
فقیري وايي،اندېښنه دا ده،چې نړیوال به یو ځل بیا افغانستان ته د ترهګرۍ د ځالې په توګه وګوري،چې دا کار د افغانستان ګټې له ګواښ سره مخ کولای شي.
فقیري زیاتوي:« دا د افغانستان ټول شهرت ته زیان رسوي. د افغانستان برم ته زیان رسوي او افغانان یو نوعه تروریست، غیر قانوني خلک او یا یاغیان معرفي کوي. بیا هم وایم،چې طالبانو په دې برخه کې د افغانستان ملي منافعو پر ضد اقدام کړی دی.»
امریکایانو څو میاشتې وړاندې افغانستان ته د اسامه بن لادن د زوی راتګ تائید کړی و او ویلي ول، القاعده له اسلامي امارت سره ژورې اړیکې لري او واک ته د اسلامي امارت رسیدو سره سیمه ییزو او نړیوالو وسله والو ډلو افغانستان ته مخه کړې ده،هغه څه چې طالبان یې ردوي .
سره له دې چې اسلامي امارت نړیوالو ته ډاډ ورکړی دی،چې له افغان خاورې نه به ورته ګواښ نه پيېښږي،خو نړیوال پرې قانع نه ښکاري.
د امریکا متحده ایالتو ۲۰ کاله وړاندې په افغانستان برید وکړ،چې د القاعدې شبکې مشر اسامه بن لادن افغانستان کې اوسېده.
اسلامي امارت د افغاني ننګ په خاطر د امریکامتحده ایالتو ته اسامه بن لادن ورنه کړ،چې بلاخره یې حکومت د امریکامتحده ایالتو له لوري رانسکور شو.
خو له دې برید وروسته به هغه وسله والې ډلې چې له بهره راځي او هڅه کوي، اسلامي امارت سره بیعت وکړي،خپل خوندیتوب خطر کې وګوري.
اسلامي امارت په کابل کې د امریکامتحده ایالتو ډرون الوتکې برید تائید او غندلی دی،خو د ایمنالظواهري د وژلو کیدو په تړاو یې تر اوسه پورې څه نه دي ویلي.
