Skip to content
د ازبکستان پلازمېنه تاشکند کې د افغانستان په اړه د یو نړیوال کنفرانس پرلومړۍ ورځ د اسلامي امارت بهرنیو چارو سرپرست وزیر مولوي امیرخان متقي ناستې ته وینا وکړه او افغانستان کې یې د خپلې واکمنۍ د لاس ته راوړنو، راتلونکو پلانونو او شته فرصتونو په په اړه خبرې وکړې.
متقي وايي، اسلامي امارت ټینګ عزم لري،چې افغانستان نور، د سولې، ثبات او اقتصادي همکاریو مرکز شي او په خبره یې افغانستان کې ټيکاو د ټولې سیمې ثبات تضمینولای شي.
د متقي په خبره، د نوي بهرني سیاست یو اساسي رکن اقتصاد محوره دی او افغانستان د سیمې په اقتصادي پرمختګ او ثبات کې مهم رول لري.
متقي زیاته کړه:« اوس د دې وخت را رسېدلی دی،چې افغانستان په عملي ډول د اسیا پر څلور لارې بدل شي. ډاډمن امنیت، ټینګ سیاسي،عزم او شفاف اداري نظام هغه عوامل دي، چې دې هدف ته په رسېدو کې مرسته کوي. افغانستان د منځنۍ اسیا او جنوبي اسیا ترمنځ د سوداګریزې راکړې ورکړې ترټولو نژدې او ارزانه لاره برابروي.»
متقي یو ځل بیا خپلو ګاونډیانو او نړیوالو ته ډاډ ورکړ،چی د افغانستان له خاورې به دوی ته زیان ونه رسیږي.
متقي وايي، د امنیت د ورانوونکو پر وړاندې یې د نظام پالیسي روښانه ده او په تېر يوه کال کې یې په عمل کې ثابته کړې.
ازبکستان یو هغه هېواد دی چې داعش په تیره یوه میاشت کې یې په ازبکستان راکیټونه وتوغول،چې دلته متقي وویل،داعش خلاف یې عملیات بریالي وو او هېڅ یوې ډلې ته اجازه نه ورکوي،چې د افغانستان له خاورې نورو ته زیان واړوي.
هغه زیاته کړه:« امنیتي او دفاعي ځواکونه د داعش ډلې پرخلاف ښیې لاسته راوړنې لري. په وروستیو میاشتو کې،چې د افغانستان او ازبکستان پر پوله د امنیت د تخریب په موخه کومې ناکامې هڅې وشوې،زموږ امنیتي ځواکونو د پېښې د عاملینو پرخلاف عملیات وکړل. داعش او بلې هېڅ ډلې ته به اجازه ورنه کړو،چې د افغانستان له خاورې د بل هېواد پر ضد کار واخلي.»
د تاشکند کنفرانس کې د امریکا متحده ایالتو،روسیې او چین سربیره د نږدې ۲۰ هېوادونو او نړیوالو سازمانونو استازو ګډون کړی دی.
دغه نړیوال کنفرانس د افغانستان په تړاو رابلل شوی او کابل ورته د افغانستان اقتصادي پرمختګ نوم ورکړی دی.
متقي یو ځل بیا له نړیوالو وغوښتل،چې د افغانستان له دولت سره رسمي تعامل وکړي.
هغه زیاتوي:« موږ د نړۍ له ټولو هېوادونو سره د متقابل احترام او دوه اړخيزو مشروع ګټو په چوکاټ کې مثبت تعامل ته چمتو يو او د نړۍ له هېوادونو هم غوښتنه لرو،چې په دې برخه کې خپل مسووليت تر سره کړي. همدارنګه د نړۍ پر نورو هېوادونو غږ کوو،چې د افغانستان له اسلامي امارت سره د اوږدمهالو دوه اړخيزو مشروع ګټو د باوري کولو لپاره رسمي تعامل پيل کړي.»
د تاشکند نړیوال کنفرانس کې روسیې او ازبکستان د امریکا له متحده ایالتو غوښتي دي، چې د افغانانو کنګل شوې شتمنۍ ازاده کړي.
د افغانستان اسلامي امارت وایي،له سیمې او نړۍ توقع لرو،چې د افغانستان د امنیت د ټینګښت په برخه کې خپله هڅه او مرسته ونه سپموي، له متحده ایالاتو یې وغوښل،چې د دوحې په هوکړې عمل وکړي.
