Skip to content
د هېواد شمال جوزجان ولایت د عامې روغتیا ریاست مسوولین وايي،په دې ولایت کې خلکو ته عامه پوهاوي او د نړیوالو روغتیايي مرستو د کولرا ناروغۍ تر ډېره حده مهار کړې ده.
جوزجان عامې روغتیا ریاست سرویلانس ډاکټر خالص قادري وايي:« عامې روغتیا د اوبو صحي کولو لپاره ډېرې هڅې کړې. اوس مهال عملا د اوبو ټانکرونه صحي اوبه ولسوالیو ته لېږي او اوس پېښې د عامې روغتیا ریاست تر کنترول لاندې دي.»
له بلې خوا بیا د جوزجان ولایت د اقچې ولسوالۍ ۵۰ بستریز روغتون مشر ډاکټر عبدالقیوم رسولي وایې، په یوه شپه او ورځ کې به شااوخوا ۷۰ تنه هغه ناروغان،چې په شدید نس ناستي به اخته ول، مراجعه کوله،چې اوس دغه شمیر د پام وړ کم شوی دی.
رسولي زیاته کړه:« دلته مو د شپې او ورځې ۷۰ یا ۸۰ ناروغان بستر کړي. اوس تاسې ولیدل،چې یوازې دوه ناروغان لرو. ۹۸ سلنه د کولرا پېښې په اقچې ولسوالۍ کې کمې شوې دي.»
د یاد ولایت د عامې روغتیا ریاست مشر عبدالغني صمیم بیا له خلکو غواړي،چې دغه ناروغي دې عادي نه ګڼي او روغتیايي سپارښتنې او لارښوونې دې مراعات کړي.
صمیم زیاته کړه:« له یونیسف، ډبلیو. اېچ. او او خیریه بنسټونو مننه کوم.هېله لرم،چې خپلې همکارۍ نورې هم جاري وساتي.»
د هوا په ګرمېدو سره د هېواد له شمالي ولایتونو سربیره په سویل کې هم زرګونه کسان په کولرا یا شدیده نس ناسته ناروغۍ اخته شوي او لسګونه ناروغان مړه شوي دي.
داکتران کولرا یا شدید اسهالات یوه باکتریايي ساري ناروغي بولي او وايي،که ناروغ سمدستي روغتون ونه رسول شي،د مړینې لامل هم کیدای شي.
