Skip to content
په افغانستان کې د قطر سفارت مسوولینو د اسلامي امارت پوهنې وزارت له سرپرست وزیر سره په کتنه کې په بېلابېلو برخو کې د همکاریو ډاډ ورکړی دی.
د یاد وزارت له لوري په خپره شوې خبرپاڼه کې ویل شوي،په کابل کې د قطر مرستیال سفیر سعید العداد او سرپرست وزیر مولوي نورالدین منیر لېدنه کې افغانستان کې د لا نورو همکاریو ټټر وهلی دی.
د خبرپاڼې یوه برخه:« قطر هېواد تل له افغانستان سره نږدې اړیکې پاللي دي. اسلامي امارت ټولو هېوادونو سره متقابل احترام او دوه اړخیزو همکاریو ته ژمن دی. لېدنه کې قطر افغانستان سره د تعلیمي بهیر په اړه وویل او په افغانستان کې یې د ښوونځیو لپاره د ودانیو د جوړولو په برخه کې د مرستې یادونه وکړه.»
په ورته مهال د افغانستان اسلامي امارت د ښارجوړونې او ځمکو وزارت ویاند محمد کمال افغان وايي،قطر د کابل خوشحال خان سیمه کې د هغه ښارګوټي چارې پیل کړي،چې کلونه مخکې یې د جوړولو پلان جوړ شوی وه،خو د ځینو ستونزو له امله یې تر اوسه پورې عملآ چارې نه وې پيل کړې.
افغان زیاته کړه:« د ښار جوړولو او ځمکو وزارت د الغارفه په نوم د خیریه بنسټ کسان یې راوغښتل او له هغوی سره یې خبرې وکړې،چې دوی باید دغه پروژه پیل کړي او په افغانستان کې یې ګټې اخېستنې ته وسپاري. هغوی هم یو لړ شرایط وړاندې کړل، چې اسانتیاوې برابرې کړئ او موږ کار پيل کوو. موږ هغوی ته اسانتیاوې برابرې کړې او دوه اوونۍ کېږي،چې عملا یې کار پيل کړی دی. دغه ښارګوټی خوشاله مینه یا پنځمه ناحیه کې موقیعت لري.»
قطر هغه هېواد چې د امریکا متحده ایالتو او اسلاميامارت ته یې د سولې خبرو لپاره ۱۸ میاشتې کوربتوب وکړ او د جمهوریت له پرځېدو وروسته له اسلامي امارت سره یې ښې اړیکې پاللي دي.
د سیاسي چارو شنونکي له دې هېواد سره د اسلامي امارت اړیکې ګټورې ګڼي او په باور یې له دوحې سره د کابل اړیکو پیاوړتیا له نړیوالو او په ځانګړي توګه د امریکا له متحده ایالتو سره د اړیکو رغیدو په مانا بولي.
د سیاسي چارو شنونکی عزیز معارج وايي:« څه چې قطر کوي، مانا دا ده،چې امریکامتحده ایالت، انګلیس،ناټو او غرب دا کار کوي.»
په افغانستان کې فقر،بې وزلي او بې کاري هغه سترې ستونزې دي،چې اوس مهال ورسره میلیونونه افغانان مخ دي، چې ځینو هېوادونو یې په اړه ژوره اندېښنه هم څرګنده کړې.
قطر چې په افغانستان کې د امریکامتحده ایالتو ډیپلوماټیکې اړیکو ساتلو مسوولیت هم لري، له کلونو راهیسې یې اسلامي امارت ته په خپله خاوره کې سیاسي دفتر ورکړی، خو لا هم دغه دفتر په سفارتي کچه نه دی.
شنونکي وړاندیز کوي، چې د افغانستان اسلامي امارت باید له قطر سره د ښو اړیکو ترڅنګ دغه هېواد کې خپل سفارت هم پرانیزي.
