دوی وايي، د پاکستان دغه وروستۍ څرګندونې چې غواړي،د واخان کورېدور له لارې منځنۍ اسیا ته لار پیدا کړي، د افغانستان ترانزیتي موقیعت له خطرسره مخامخ کوي.
د دوی په خبره، که چیرې پاکستان د واخان کورېدور له لارې له مرکزي اسیا او چین سره وصل شي، ټولې هغه ګټې او اقتصادي موخې به له منځه لاړې شي،چې اوس او یا په راتلونکي کې یې له ترانزیټ له لارې لاسته راوړي.
د سیاسي چارو کارپوه نورالله عزیز وايي:« د واخان کارډور اړوند د پاکستان وروستۍ څرګندونې،دهغو هڅو یوه برخه ده،چې دوی په لوی لاس غواړي،د افغانستان د ستراټیژیک ترانیزیټي موقیعت چې د سوېلي او مرکزي اسیا هېوادونو لپاره یې لري،هغه له خطر سره مخامخ کړي. که چیرې پاکستان د واخان کارډور له لارې مرکزي اسیا هېوادونو ته لار پیدا کړي،نو دا به د افغانستان هغه ګټه،چې د ترانزیټ له لارې لاسته راوړي،له خطر سره مخامخ کړي.»
ځینې بیا وايي،که چیرې پاکستان د واخان کورېدور لاسته راوړي،نو افغانستان به له اقتصادي پلوه په یوه ویجاړ کلي بدل شي.
د سیاسي چارو کارپوه اختر محمد راسخ وايي:« که یو ځل دا کورېدور درنه تیرشو او پنجاب منځنۍ اسیا ته خپله لار پیدا کړه،افغانستان به په یوه کنډواله بدل شي.»
د سیاسي چارو کارپوه طارق فرهادي بیا وايي، د پاکستان لپاره دا مهمه ده،چې د واخان کورېدور له لارې ځان منځنۍ اسیا ته ورسوي،خو د اوس لپاره دا هرڅه د یوې شایعې په توګه نشریږي،ترڅو اسلام اباد بیا په راتلونکي په دې تړاو اقدام وکړي.
فرهادي وايي،مهمه ده،چې اوس افغانستان له سیاسي لحاظه ثبات ته ورسیږي او په دغو مسایلو راتلونکې کې تصامیم ونیسي.
هغه زیاته کړه:«دا د پاکستان لپاره ډېر مهمه ده،چې مرکزي اسیا ته خپله لار ولري،خو فعلآ دا مسایل چې پاکستان واخان ته رسیدلی، شایعات دي،خو افغانستان باید د ثبات لور ته ولاړ شي او بیا وروسته دا ډول مسایلو باندې بحث او خبرې وشي،چې د هېواد ګټه په کې وي.»
خو د افغانستان اسلامي امارت مرستیال ویاند بلال کریمي بیا وايي، واخان او د افغان خاورې هره بله برخه د افغانستان جز ده او دوی به ترې دفاع کوي.
