د هرات اوسېدونکي د نفتي توکو په بیو کې د بېساري لوړوالي راتلو له امله شکایت کوي. دوی وایي، په بېساري ډول د نفتي توکو بیو لوړوالي یې ورځنۍ چارې له ستونزو سره مخ کړې دي او د کمزوري اقتصادي وضعیت له امله په لوړه بیه د تېلو پېرلو وس نه لري.
د هرات اوسېدونکی، فضل احمد وايي: « دولت باید پر شرکتونو بشپړ نظارت ولري، ترڅو دوی په خپل سر بيې وضع نه کړي او دغه راز بې کیفیته تېل وارد نه کړي.»
د هرات اوسېدونکی، احمد بلال وايي: « که د تېلو بیې ټیټې شي، هم موږ ته ښه دی او هم شرکتونو ته. موږ مجبور یو په داسې بیه ټیکټونه خرڅ کړو چې لګښتونه مو پوره کړي.»
د تېلو بیو لوړوالي سره هم مهاله، له هرات څخه نورو ولایتونو ته د مسافرو لېږد کرایې هم لوړې شوې دي.
موټر چلوونکي او د ټرانسپورټي شرکتونو مسوولین وایي، د تېلو بیو له بېساري لوړوالي سره نورو ولایتونو ته د مسافرو لېږد کرایو کې هم له ۲۰۰ څخه تر ۴۰۰ افغانیو لوړوالی راغلي.
د یوه ټرانسپورټي شرکت مسوول، نذیر احمد وايي: « که تېل ارزانه شي، کرایې هم ورسره ټیټېږي. دا مهال د نیمروز کرایه ۶۰۰ افغانۍ ده چې له دې وړاندې ۴۰۰ افغانۍ وه. کله چې موږ بس چلوونکو ته وایو چې نیمروز ته لاړ شي، وايي تېل قېمته دي او لګښت نه پوره کوي.»
موټر چلوونکی، جاوېد احمد وايي: « زموږ دولت باید د تېلو قېمت ټیټولو هڅې وکړي. که تېل قېمته وي، ښکاره خبره ده چې کرایه هم ورسره لوړېږي.»
هرات کې د نفت او ګازو دولتي شرکت مسوولین او د سیمه ییزې ادارې ویاند په دې اړه زموږ پوښتنو ځوابولو ته حاضر نه شول.
تېل پلورونکي د روسیې پر نفتي تأسیساتو د اکراین بریدونه او له امله یې د دې هېواد د نفتي زېرمو زیانمنېدل، د تېلو صادرات کمېدل او د ایران او امریکا جګړې له امله د هرمز تنګي تړل کېدل، په نړېواله کچه د نفتي توکو د بیو لوړوالي اصلي لاملونه بولي.
تېل پلورونکی، حمیدالله وايي: « د تېلو بیې لوړېدل مختلف عوامل لري، د مثال په توګه د امریکا او ایران ترمنځ جګړې له امله د هرمز تنګي تړل کېدل او د نفتو د تولید کمېدل.»
تېل پلورونکی، فردوس عظیمي وايي: « تېل ۷۷ افغانۍ وو، خو اوس ۹۰ افغانۍ ته پورته شول. علت دا دی چې د تېلو واردات کم شوي او افغانستان خپله تېل نه لري.»
هرات کې دامهال یو لېټر سوپر پټرول له ۷۵ افغانیو څخه۹۰ افغانیو ته، یو لېټر عادي پټرول ۸۳ افغانیو او یو لېټر ډیزل ۷۷ افغانیو ته پورته شوي دي.
