Skip to content
د فېسبوک ادارې د افغانستان ملي رادیو ټلوېزیون(آر.ټي.ای) پښتو او دري فېسبوک پاڼې تړلې دي.
د افغانستان ملي راډیو ټلویزیون مشر احمدالله وثیق وايي،پر فیسبوک د دغې ادارې پښتو او دري رسمي پاڼې او د انسټګرام اکونټ د فیسبوک ادارې تړلي دي.
وثیق د فیسبوک ادارې دا ګام، د ټولو رسنیزو اصولو او بیان ازادۍ خلاف کار بللی دی.
وثیق زیاته کړه:«د ملي راډیو ټلوېزیون پښتو او درې فیسبوک او انسټاګرام پاڼې د فیسبوک ادارې له لوري د نامالومو دلایلو له امله تړل شوي دي. د فیسبوک ادارې دا کار د ټولو رسنیزو اصولو او د بیان ازادۍ خلاف عمل دی. ملي راډیو ټلوېزیون یو ملي بنسټ دی، د ملت غږ او د خلکو رسنۍ ده او یوازې هغه څه په کې خپرېږي،چې ولس یې غوښتنه کوي.»
وثیق د فیسبوک له ادارې غوښتي، چې رسنیزو اصولو ته په پام د بیان ازادۍ ته ژمن پاتې شي او د ملي راډیو ټلوېزیون پاڼې دې خلاصي کړي.
هغه زیاته کړه:« ملي راډیو ټلوېزیون د خلکو رسنۍ په توګه،چې تل یې د خلکو غږ ته پوښښ ورکړی دی، پر خپل درېځ ټېنګار کوي او د فیسبوک له ادارې غواړي، رسنیزو اصولو ته په پام سره د بیان ازادۍ ته ژمنه پاتې شي او د ملي راډیو ټلوېزیون ټولنیزې پاڼې دې ژر تر ژره خلاصې کړي.»
دا پاڼې نږدې یوولس میاشتې د اسلامي امارت په واک وې،چې وروستیو کې د ملي راډیو ټلویزیون له لوګو د افغانستان درې رنګه بېرغ پاک او لوګو یې بدله شوه، چې هغه وخت یې د ټولنیزو رسینو فعالانو غبرګونونه هم را وپارول.
د ملي راډیو ټلویزیون سره هم مهاله د باختر دولتي اژانس فیسبوک پاڼه هم تړل شوې ده.
باختر خبري آژانس د فیسبوک ادارې له لوري په دغه کار نیوکه کړې او ویلي یې دي، چې دا کار د ازادۍ سلبول دي.
یاد آژانس زیاته کړې:« باختر خبري اژانس د اطلاع رسونې ۸۲ کاله مخینې په لرلو، د فیسبوک ټول اصول او قوانین په نظر کې نیولي او یوازینی هدف یې پر وخت، دقیق او هر اړخیزه اطلاع رسونه ده. د فیسبوک دغه کار له افغانانو د ازادۍ حق اخېستلو په مانا ده. هیڅ څوک یا اداره نه شي کولای،چې افغانستان کې ازادي سلب کړي، نو د باختر خبري اژانس رهبري له فیسبوک ادارې غواړي،چې رامنځته شوې ستونزه ژر حل کړي.»
اوس به ولیدل شي،چې د فیسبوک اداره، د ملي راډیو ټلویزیون او باختر اژانس د رهبرۍ غوښتنو باندې غور کوي،بې ځوابه یې پریږدي او که تړلي اکاونټونه بېرته خلاصوي؟
