Skip to content
د افغانستان مخکېني دولت له سقوط،کابو یو کال وروسته، د ولسي جرګې ځینې مخکینيو غړو انلاین ناستې پیل کړي دي .
د یادې جرګې د دارالانشاء مخکینی مشر عبدالقادرځاځی وايي،ولسي جرګه اوس هم خپل نړیوال مشروعیت لري او د نړیوالو پارلمانونو ټولنه یې پر رسمیت پیژني.
ځاځی وايي،له دوی سره شااوخوا دمخکینۍ جرګې یوثلث غړي په دغو ناستو کې ګډون کوي او هم نظره دي.
هغه زیاته کړه:« د نړیوالو پارلمانونو ټولنه کې اوس هم که تاسو یې ویب سایټ ته مراجعه وکړئ، د افغانستان ملي شورا برحاله ده او غړیتوب یې لري.»
د ولسي جرګې ځینو پخوانیو غړو،چې اوس له هېواده بهر دي انلاین ناستې یې پیل کړي او د ناستو ترتیب یې داسې دی،چې په اوونۍ کې به درې ورځې رسمي انلاین ناستې ولري.
ځاځي وايي:« د اوس لپاره اوونۍ کې درې ځلې،لکه څنګه چې پخوا به درې ورځې تالار وه، زموږ وړاندیز هغه وه. دا چې استازي څه کوي، د اوونۍ یوه ورځ ناسته کوي، دوه ورځې یې کوي، درې ورځې یې کوي، دوه ساعته یې کوي، یو ساعت یې کوي، دا بیا د دوی صلاحیت دی.»
پر دغې جرګې نیوکې دي،چې دجمهوریت پرمهال چې پوره صلاحیت او قانوني مشروعیت یې درلود ،ستونزې یې حل نه شوې کړای او اوسنۍ ناستې یې د ولس او هېواد پر ګټه نه دي.
د سیاسي چارو شنونکې مریم معروف آروین وايي:«له بده مرغه تېرو شلو کلونو کې چې څنګه فرصت برابر شوی وو، د خلکو استازو ونشو کولی،د مقننې قوې په توګه خپل مسوولیت د هېواد او خلکو پر وړاندې ادا کړي.»
د مخکینۍ ولسي جرګې ځينې غړي،چې نه غواړي نومونه یې واخېستل شي،شمشاد ته یې وویل،د پخوانیو وکیلانو د انلاین ناستو د ترتیب ترشاه د ځینو کړیو او افرادو شخصي ګټې پرتې دي.
دوی وايي،دا ناستې نه یوازې دا چې د افغانستان پر ګټه نه دي،بلکې لاهم نړۍ ته د تیر جمهوریت هغه مخ ورښکاره کوي،چې د اداري فساد تورونه پرې وو او د فساد په برخه کې د نړیوالو شک په یقین بدلوي.
