د ملګرو ملتونو د بشري مرستو همغږۍ دفتر(اوچا) ویلي، په افغانستان کې له اړمنو افغانانو سره نړیوالې بشري مرستې محدودې او کمې شوې دي چې له امله یې میلیونونه خلک په خورا ناوړه وضعیت کې ژوند کوي.
اوچا د افغانستان په ختیځ کې د تېر کال ویجاړونکې زلزلې اغېزمن شوي په سخت بشري وضعیت کې بللي او له نړیوالې ټولنې یې غوښتي چې د اړمنو افغانانو سره د بشري مرستو په برخه کې یې مالي ملاتړ وکړي.
د ملګرو ملتونو د بشري مرستو همغږۍ دفتر مشره، امې مارټېن وايي: « ژمی ډېر رانږدې دی، نو بشري ملاتړ یوازې سلګونه کورنیو ته چمتو شوی، له لنډ مهالو سرپناوو دایمي سرپناوو ته لېږد، د خلکو د خوښۍ سبب کېږي. دا مرستې لا هم ډېرې کمې دي او زیاتو مرستو ملاتړ ته اړتیا ده. د دې لنډ مهالو سرپناوو اوسېدونکي اوس نه شي کولی خپلو اصلي مېنو ته ور وګرځي.»
د ملګرو ملتونو اړوند بشري مرستندویه بنسټونه په افغانستان کې د اقلیمي بدلون ناوړې اغېزې، د زلزلو پراخ زیانونه، له ګاونډیو هېوادونو د میلیونونو افغان کډوالو را شړل او د کاري فرصتونو کمښت، هغه عمده لاملونه ګڼي چې افغانان یې بېړنیو بشري مرستو ته اړ کړي دي.
په ورته مهال، شنونکي وايي اوسمهال چې افغانستان له ګڼو اقتصادي ستونزو سره لاس او ګرېوان دی او د بېروزګارۍ کچه هم تر یوې کچې لوړه ده، د نړیوالو بشري مرستو کمښت به بشري وضعیت نور هم سخت کړي.
دوی له نړیوالې ټولنې غواړي چې اړمنو افغانانو ته د بشري مرستو په رسولو کې خپلې مالي همکارۍ ونه سپموي.
د اقتصادي چارو شنونکی سید مسعود وايي: « د نړیوالو سازمانونو موجودیت او د هغوی بشري مرستې که څه هم بشردوستانه دي نه اقتصادي، بیا هم ډېر اهمیت لري. دا اهمیت یې هم له سیاسي پلوه دی، هم له اقتصادي او اجتماعي پلوه. دا مرستندویه سازمانونه افغانستان له نړۍ سره نښلوي او دوی کولی شي د افغانستان خبرې نورې نړۍ او د نورې نړۍ افغانستان ته ورسوي.»
د ملګرو ملتونو د موندنو پر بنسټ، اوسمهال نږدې ۲۳ میلیونه افغانان بشري مرستو ته اړ دي چې له ډلې یې نږدې ۱۵ میلیونه په بېړني بشري وضعیت کې دي او دغه راز، د دې سازمان اړوند د ماشومانو وجهي صندوق(یونیسف) هم تېره اوونۍ راپور ورکړی چې په افغانستان کې د بشري وضعیت له خرابېدو سره اوسمهال ۳.۷ میلیون ماشومان په خوارځواکۍ اخته دي.
