اسوشیټېد پرس خبري اژانس راپور ورکړی چې د ډونالډ ټرمپ په مشرۍ د امریکا حکومت، یو ډله پناه غوښتونکي چې شمېر یې دقیق نه دی په ډاګه شوی، له دې هېواد څخه یوه افریقايي هېواد ته لېږدولي دي.
په راپور کې زیاته شوې، په دغو کسانو کې دولس تنه افغانان، اته تنه ایرانيان او یو شمېر نیپاليان او د نیکاراګوا هېواد اتباع شامل دي.
راپور کې زیاته شوې، د یادو پناه غوښتونکو لېږدوونکې الوتکه تېره ورځ د «مرکزي افریقا جمهوریت» پلازمېنې «بنګوي» ښار کې کښته شوې.
په دې ډله کې د خلیل په نوم یو تن هغه افغان هم شامل دی چې ویل کیږي د کورنۍ غړي یې په تېر نظام کې د امنیتي او دفاعي ادارو په اډانه کې له امریکايي ځواکونو سره همکار پاتې شوی او تر دې وړاندې د امریکا یوې محکمې هغه ته د خوندیتوب او نه ډيپورټ کېدو امر ورکړی و.
د اسوشیټېد پرس په راپور کې زیاته شوې: « د امریکا متحده ایالتونو د شنبې په ورځ د افغانانو په شمول په دې هېواد کې مېشت یوه ډله پناه غوښتونکي مرکزي افریقا جمهوریت ته استول شوي چې په کې یو هغه افغان هم شامل دی چې ورور یې تر دې وړاندې په افغانستان کې له امریکايي ځواکونو سره همکار پاتې شوی و.»
له دې ډلې د پاتې افغان پناه غوښتونکو د هویت په تړاو راپور کې نور څه نه دي ویل شوي.
همدارنګه، ویل کیږي د ټرمپ ادارې د پټو هوکړو له مخې تر دې وړاندې هم ګڼ پناه غوښتونکي په جبري ډول درېیمو هېوادونو ته لېږدولي چې دغه کار دننه په امریکا کې د بشري حقونو او د پناه غوښتونکو مدافع سازمانو له نیوکو سره مخ شوی.
د کډوالو د حقونو چارو مدافعان د امریکا حکومت دا کړنه له قانوني تشې او نیمګړتیا څخه د ټرمپ د ناوړه ګټنې په مانا بولي.
په امریکا کې د افغان پناه غوښتونکو مدافع بنسټ(افغان ایواک) د امریکا د مدني ازادیو ټولنې او د بشري حقونو اړونده مدافع ادارې یاد افریقايي هېواد ته د پناه غوښتونکو لېږدول تایید کړي دي.
د کډوالو حقونو فعال عبدالرازق عدیل وايي: « درېیمو هېوادونو ته د افغان پناه غوښتونکو او د امریکايي ځواکونو د پخوانیو همکارانو اخراج، د خپلو عملیاتي همکارانو له ملاتړ څخه د یوه ابر قدرت د حقوقي او اخلاقي ارزښتونو ښکاره شاتګ دی. له امریکا یا ناټو سره د افغانان همکارانو په اړه تر ټولو غوره او عادلانه سیاست دا دی چې دوسیې یې په فردي توګه وڅېړل شي.»
واک ته د امریکا د اوسني ولسمشر ډونالډ ټرمپ له بیاځل رسېدو سره سم، نوموړي امریکا کې د پناه غوښتنې پروسه د پخوا په پرتله لا ډېره پېچلې کړې او پر وړاندې یې ګڼ خنډونه رامنځته کړي.
دا داسې مهال ده چې تر دې څو اوونۍ وړاندې ځینې امریکايي سناتورانو کانګرس ته د افغانانو د لنډمهاله خوندیتوب حالت طرحې وړاندې کولو ته چمتووالی ښودلی و.
د دې طرحې له تصویبېدو سره تر ۲۰۲۹زېږدیز کال پورې په امریکا کې هغو افغانانو ته د کار قانوني جواز او د هغوی د پناه غوښتنې قضیو ته د رسېدنې فرصت ورکول کېده چې دامهال د ایستل کېدو له ګواښ سره مخ دي.
