د جرمني بهرنیو چارو وزارت د جمعې په ورځ د اسلامي امارت د پلاوي موجودیت تایید کړی او وايي، د سفر اساسي موخه یې د یو شمېر نورو افغان وګړو ستنولو ته د چمتوالي نیول دي.
د دې وزارت په وینا، دغه پلاوی یو لنډمهاله تخنیکي ملاتړ کوونکی ټیم دی چې په راتلونکې کې د یو شمېر هغو افغانانو د بېرته ستنولو لپاره د الوتنو اړین اداري او کونسلي ترتیبات برابروي.
د «انډيآر» د راپور له مخې، پلاوی اوس مهال د برلین په ګرونېوالډ سیمه کې د افغانستان په سفارت کې مېشت دی او تمه ده چې راتلونکې اوونۍ بن او مونیخ ښارونو ته هم سفر وکړي. بن او مونیح دواړه هغه ښارونه دي چې افغانستان په کې کونسلګرۍ لري.
د جرمني «انډيآر» راډیو ټلوېزیون د راپور یوه برخه کې راغلي: « جرمني په جدي جرمونو د محکومو شویو افغان وګړو د بېرته ستنولو د شمېر زیاتولو هڅې کوي. د جرمني حکومت مخکې ویلي وو چې غواړي په کابل کې له چارواکو سره د عملي ترتیباتو له لارې افغانستان ته د افغانانو د ستنولو بهیر بیا پیل کړي، سره له دې چې جرمني لا هم اسلامي امارت په رسمیت نه دی پېژندلی.»
بله خوا، اسلامي امارت هم د دوی د پلاوي د سفر په اړه څه نه دي ویلي. له دې مخکې هم د اسلامي امارت یوه پلاوي بروکسېل ته سفر کړی و او هلته هم تر ډېره د افغان کډوالو د بېرته ستنولو په اړه خبرې شوې وې.
همداراز راپور کې ویل شوي چې تېر کال د اسلامي امارت استازو جرمني ته د یوه جلا هدف لپاره سفر کړی و، ترڅو د افغانستان د پخواني جمهوري نظام له لوري ټاکل شوي ډېپلوماټان بدل کړي.
که د برلین سفارت او بن کې د کونسلګري فعالیتونو ته وکتل شي، نو اسلامي امارت لا د مخه خپل دوه ډېپلوماټان ټاکلي دي.
د راپور له مخې، اوس دوه اسلامي امارت پلوه ټاکل شوي ډېپلوماټان په برلین کې د افغانستان سفارت او په بن کې کونسلګرۍ ګې چارې په عملي ډول سمبالوي.
