نړیوال اقتصادي فورم د نړۍ په ۱۴۶ هېوادونو کې د ښځو او نارینهوو تر منځ د مساوي حقونو، سیاسي، تعلیمي او روغتیايي لاسته راوړنو په برخو څېړنې کړي دي.
نړیوال اقتصادی فورم په یوه تازه راپور کې افغانستان نارینه واکمنو ټولنه یاده کړې او ویلي یې دي،چې د ښځو لپاره په اقتصادي او سیاسي برخو کې د فعالیت فرصتونه نشته او د تېر پرتله په بې ساري ډول دغه فرصتونه راښکته شوي دي.
په راپور کې افغانستان، پاکستان او ایران په ترتیب د هغو ۱۴۶هېوادونو په سر کې یاد شوي،چې جنسیتي نابرابري په کې زیاته ده.
د نړۍ په ۱۴۶ هېوادونو کې افغانستان ۱۴۶ ، پاکستان ۱۴۵ او ایران بیا ۱۴۳ ځای خپل کړی دی.
د نړیوال اقتصادي فورم د راپور یوه برخه:« افغانستان او پاکستان په نړیواله درجه بندۍ کې له ایران سره د لومړیو پنځو هېوادونو په ډله کې دي،چې جنسیتې نا برابري په کې زیاته ده. په اقتصادي او سیاسي فعالیتونو کې د ښځو ګډون نه تر سترګو کیږي او تعلیمي او روغتیایي لاسته راوړنې هم نه لري.»
یاد فورم په ۲۰۲۰ زېږدیز کال کې ویلې ول،چې د جنستیې نا برابرۍ له منځه وړل به افغانستان کې شااوخوا ۱۰۰ کاله وخت ونیسي.
د نړیوال اقتصادي فورم، په نوې راپور کې بیا راغلي،چې د افغانستان اسلامي امارت په واکمنیدو سره افغانستان کې دا ستونزه لا زیاته شوې او ۱۳۰ کلونو زیات وخت ته اړتیا ده،چې حل شي.
د نړیوال اقتصادي فورم راپور یوه برخه:« دا به ۱۳۲ کاله نور وخت ونیسي، چې د نړیوال جنسیت تشه بنده شي. لکه څنګه چې بحرانونه پیچلي او زیاتیږي،د ښځو د کاري ځواک پایلې لا زیانمنې کیږي،چې د جنسیت د برابرۍ د شاته کیدو ګواښ نور هم ګړندی کوي.»
اخوا د سیاسي چارو یو شمېر شنونکي بیا د نړیوال اقتصادي فورم دغه راپور حقیقت بولي او وایي، افغانستان کې ان ښځو ته شرعي حقونه هم نه ورکول کیږي.
دوی وايي، د ښځو او نجونو لومړنی او اساسي حق زدهکړې دي،چې افغانستان کې ترې اوس مهال دا حق هم اخېستل شوی دی.
د افغانستان اسلامي امارت بیا د نړیوال اقتصادي فورم دغه راپور ته تر اوسه پورې کوم غبرګون نه دی ښودلی، خو غوښتنه دا ده،که د افغانستان اوسنی حکومت غواړي،نړیواله ټولنه ورسره تعامل وکړي او ټولنیز عدالت تامین شي،ښځو او نجونو ته دې له زدهکړوسربېره د کار اجازه هم ورکړي.
