Skip to content
.روان کال د هېواد د نورو ولایتونو په څېر د پکتیا ولایت ډېری سېمې د وچکالۍ له کبله زیانمنې شوې دي
د یاد ولایت د اریوب ځاځیو ولسوالۍ د سپین غر لمنو ته له مرکز ګردیز او شااخوا نورو سیمو د وچکالۍ له امله ډېری کوچیان را کډه شوي دي.
کوچیان وایي، ګردیز او شااوخوا سیمو کې یې څارویو ته اوبه او څرځایونه نه موندل کېږي او اړ شول،چې د سپین غر لمنو ته ولاړ شي.
د سپین غر لمنې ته کډه شوی یو تن کوچی عبدالخالق وايي:« سږ کال دلته راغلو. د وچکالۍ له کبله نور کلونه به ګردیز ته څېرمه اوسېدو.هلته اوبه او واښه نه شته دی. څارویو مو مرضونه کړي ځېنې ښه شوي او ځنې لا ناروغ دي.»
کوچیان وایي،دلته به تر هغه دېره وي،چې د خلکو له لوري اجازه ورکول کیږي او یا هم نورو ځایونو کې بارانونه وشي او بیا به کډې باروي.
د سپین غر لمنې ته کډه شوی یو تن کوچی عبدالرحمن وايي:« بیا خو زموږ مالومات نه شته دی،چې کوم خوا ته به ځو،خو هغې خوا ته ځو،چېرته چې بارانونه وشي او یا مو خلک پسې وانخلي. خلک هر ځای کې اجازه نه را کوي.»
۱۳ کلن عزیزالله چې د کورنۍ له نورو مشرانو سره د څارویو په ساتنه بوخت دی، وايي، ستره هېله یې ښوونځي ته تګ دی.
هغه زیاته کړه:« ښوونځي نه شته دی. بس موږ دا مال څروو. موږ ښوونځي ته اړتیا لرو. ستره هېله مې دا ده،چې ښوونځي راته جوړ شي او زده کړې په کې وکړم او باید چې ښوونځي جوړ شي.»
کوچیان وایي، روان کال یې مالداري د وچکالۍ له کبله زیانمنه شوې، څاروي یې په بېلابېلو ناروغیو اخته شوي او کرنې وزارت او مرستندویه بنسټونه دې ورسره د درملو برخه کې مرسته وکړي.
