Skip to content
د افغانستان اسلامي امارت د کابل امنیه قوماندانۍ ویاند خالد ځدراڼ وايي،د هېواد پر کچه یې کلک امنیتي تدابیر نیولي ول او د لوی اختر شپو او ورځو امنیت لپاره یې پلان بریالی وه.
ځدراڼ وايي،د لوی اختر په درې شپو او ورځو کې هېڅ کومه امنیتي پيښه نه ده شوې.
ځدراڼ زیاته کړه:« د خوښۍ ځای دی،چې په تېرو څو ورځو کې مو هېوادوال د اختر شپې او ورځې د امن په ډاډمنه امنیتي فضاء کې لمانځي. الحمد الله د کابل په پلازمینه کې کومه امنیتي پېښه نه ده ثبت شوې. دا د خدای ( ج) ځانګړی نصرت دی،چې وروسته له څو لسیزو دلته د اختر خوښۍ او مېلې په یوه ډاډمنه فضاء کې لمانځل کېږي.»
پلازمینه کابل کې هر کال په دغو ورځو کې به د امنیتي پيښو وېره وه،خو د سږني اختر په درېیو شپو او ورځو کې هېڅ کومه امنیتي پيښه نه ده ثبت شوې.
د اختر په شپو او ورځو کې ولایتونو ته د سیلانیانو تګ راتګ هم ډېر وو او ښاریان وايي،د پيښو په اړه یې له وړاندې اندیښنې کمې وې.
د کابل ښار یو تن اوسېدونکی وايي:« اوس کولی شو هر ځای کې په ازاد ډول وګرځو. په تېر حکومت کې مو نشو کولی چې بل ولایت ته په ازاد ډول چکر ته ولاړ شو. اوس فضا ښه ده کوی شو.»
د کابل ښار یو بل اوسېدونکی بیا وايي:« امنیت ښه ده. پنځه وخت مو لمونځ کوو او اوس فضا ښه شوې. شپه ورځ مو ښه ده. کاروبار مو لږ کمزوری دی هغه هم خدای مهربانه دی چې ښه شي.»
اخوا که په هېواد کې لوی اختر له امنیتي پيښو پرته ولمانځل شو،خو بېوزلۍ او فقر سږنی لوی اختر تر نورو کمرنګه کړی وه.
کابل کې یو تن بې وزله وايي:« څه وکړو! کاروبار نه شته دی. اقتصاد مو کمزوری دی. سږ کال نه د قربانۍ غوښې او نه هم مرستې راسره وشې. بس د الله ج هېله مو نیولې ده. د سړکونو پر غاړو یا بازار کې ګرځو، کراچیواني کوو.»
که سږ کال د لوی اختر لپاره کلک امنیتي تدابیر نیول شوي وو او په دغو ورځو کې کومه امنیتي پيښه ثبت نه شوه،خو د سیاسي چارو شنونکي بیا وايي، مسوولین دې د دایمي امنیت لپاره اوږدمهالي پلانونه پلې کړي.
د سیاسي چارو شنونکی یوسف امین ځاځی وايي:« موږ هېله من یو،چې همداسې ډاډمن امنیت په ټول افغانستان کې د تل لپاره راشي. خلک دې له وسله والو مخالفتونو لاس واخلي. واکمنان دې د خلکو مشروع غوښتنو ته درناوی وکړي او پلې دې کړي، ترڅو افغانان سره په یوه ټغر راټول شي.»
دا په تیرو دوه لسیزو کې اول اختر دی،چې پرته له کومې امنیتي پيښې د امن په فضاء کې لمانځل کیږي.
د افغانستان اسلامي امارت د کورنیو چارو وزارت ویلي،د اختر ورځو لپاره یې له وړاندې امنیتي تدابیر نیول شوي وو او له جوماتونو سربېره د هېواد ډېری سیمو کې د پلټڼې ځانګړي ټيمونه ځای پر ځای شوي وو.
