پرته له دې چې د اسلامي امارت بهرنیوچارو وزیر د کوم چا نوم واخلي، وايي چې هېڅوک د دې حق نه لري چې پر ولس فشار راوړي او د خپلې شخصي انګیزې په بنسټ ورسره ناسم چلن وکړي.
امیرخان متقي وايي، د تېرې شل کلنې مبارزې پرمهال افغان ولس ورسره بې شماره ستړیاوې او قربانۍ ګاللې دي، په بدو شرایطو کې یې طالبانو ته په خپلو کورونو کې ځای ورکړی، ډوډۍ یې ورکړې او ان وسلې یې هم ورته برابرې کړې دي.
د متقي په خبره، اوس یې وخت دی چې د اسلامي امارت ټولو مسوولین ولس ته خپلې غېږې پرانیزي او هېڅوک د دې حق نه لري چې ولس ته په سپکه سترګه وګوري یایې ورټي.
بهرنیوچارو وزیر وايي: « اوس د دې وخت راغلی چې په دې ملت ډېر رحم وشي. ته د یوه مسوول په توګه دې ملت ته غېږ خلاصه کړه. که یوڅوک په خپل سر د خپل مزاج لپاره له خلکو سره زیاتی کوي، پر خلکو فشار راوړي، دې ډول شخصي افکارو ته باید مخه ور نه کړو، دا لېوني افکار باید مخې ته پرې نږدو. په دې نظام کې ما او تاسو او دې ملت قرباني ورکړې، نو یو دوه یا درې کسان دا حق نه لري چې د ملت پر سرنوشت لوبې وکړي او موږ ورته لاس تر زنې کېنو. هېڅوک دا حق نه لري چې ملت ته په سپک نظر وګوري او تکلیف ورته ورسوي. دا ملت زموږ تن او وجود دی او که چېرې موږ سره ملت نه وي، به هېڅ هم نه یو.»
د بهرنیوچارو وزیر دغه راز ټینګار کوي چې باید له ولس سره داسې چلن ونه شي چې ځان له نظامه پردي وګڼي او یاهم د ناسم چلن له امله د افغانستان د مخالیفینو په لمن کې ځان واچوي.
د نوموړي په خبره، دا ولسونه دي چې حکومتونه پرې ولاړ دي او له ولس پرته دوی هېڅ هم نه دي.
امیرخان متقي زیاتوي: « هېڅوک باید آزار نه شي او نه هم د حقارت په سترګه ورته وکتل شي. هېڅوک باید د پردي توب احساس ونه کړي او په زور ټېله نه شي چې د دښمن غېږې ته ولوېږي.»
کارپوهان بیا وايي، د ولس او خلکو له ملاتړ پرته د حکومتونو دوام او پایښت ستونزمن وي.
دوی په دې باور دي چې د نظامونو پیاوړتیا او بقا د ولس ملاتړ پورې تړلې ده او حکومت باید د خپلو خلکو د ملاتړ ترلاسه کولو لپاره د هغوي حقه حقونو ته ژمن وي او غوښتنو ته یې مثبت ځواب ورکړي.
د سیاسي چارو شنونکی شهزاده مسعود وايي: « د نظامونو او حکومتونو بقا د ملت په ارادې پورې تړلې ده. که د ملت اساسي او مشروع غوښتونو ته مثبت ځواب ونه ویل شي، د دې ډول نظامونو بقا اوږده نه وي. زه د دې غوښتنې کلک تایید کوم چې د ملت غوښتنې باید ومنل شي او زړونه یې وساتل شي.»
د تاریخ په اوږدو کې دا ثابته شوې چې ولسونه د حکومتونو په نصب او عزل کې کلیدي رول لري او هغه نظامونه بریالي ګڼل کیږي چې د ولس ملاتړ او مشروعیت پرمټ یې دوام پیدا کړی وي. د اسلامي امارت مشرتابه هم تل له ولس سره پر ښه چلن ټینګار کړی او چارواکو ته یې لار ښوونه کړې چې دروازې یې باید تل د ولس پرمخ خلاصې وي.
