غني: افغانستان کې د ولس له ارادې پرته حکومت ډېر دوام نه شي کولی

د افغانستان  دوو پخوانیو  ولسمشرانو په جلا جلا اختریزو پیغامونو کې د اختر مبارکۍ ترڅنګ ګڼو نورو موضوعاتو ته هم اشارې کړي دي.

مخکېني  محمد اشرف غني په خپل اختریز پیغام کې  د وروستیو طبعي پېښو قربانیانو او د کورنۍ له  غړو سره یې خواخوږي  ښودلې او دغه راز یې په سپين بولدک او تورخم کې د مسافرو بد وضیعت ته هم اشاره کړې ده. 

غني زیاته کړې:« پکتیکا،خوست، ننګرهار او نورو ځایونو کې،چې طبیعي پېښې راغلي، ټولو ته تسلیت وایم. د هېواد په بېلابېلو برخو کې د چاودنو او تروریستي پېښو متضررینو او په ځانګړي ډول د اهل هنودو، پر عبادت ځای د تروریستي برید له امله ټولو زیانمنو کورنیو ته تسلیت وایم. په تورخم او سپین بولدک کې د بې نظمیو او ناسم چلن له امله زیانمنو افغانانو ته تسلیت وایم.»  

مخکېني ولسمشر دغه راز ویلي،اسلامي ټولنه بايد له اسلامي‌امارت سره استدلال وکړي او پايلې ته د رسېدو لپاره يوزاينۍ لار منطق، استدلال، اورېدل او د يو بل منل دي.

غني زیاتوي:« د اسلامي نړۍ له علماوو غوښتنه کوم،چې له طالبانو سره استدلال وکړي. اسلامي نړۍ د خدای ج په فضل سره یو لوی مثبت لور ته روانه ده. اړینه ده،چې دا مثبت مسیر او بهیر له طالبانو سره شریک شي.» 

دغه راز محمداشرف غني،زده کړې د هرانسان حق بللی او ویلي یې دي،چې که یوه ښځه روزل کېږي، نسلونه روزل کېږي.

هغه زیاته کړې:«د علم زده کړه فرض ده او په اسلامي نصوصو کې څو څو ځله پر زده کړې ټېنګار شوی دی. د پیغمبر (ص) یو روایت دی، چې فرمايي،چې علم ولټوۍ، ان کې په چین کې هم وي. ټولو نړیوالو تجربو ښودلې ده،چې د یوې نجلۍ تعلیم پنځه نسلونه بدلولی شي او د یوه هلک تعلیم یوازې یو نسل بدلوي.»

په ورته وخت کې غني د ولس له ارادې پرته د حکومت دوام ستونزمن یاد کړ او پر اسلامي نړۍ یې غږ وکړ،چې د افغانستان له اسلامي امارت سره استدلال وکړي او په مهمو موضوعاتو ورسره وغږېږي.

بلخوا بیا پخواني ولسمشر حامد کرزي په خپل اختریز پيغام کې هم د نجونو پر زده کړو  ټېنګار کړی او پر اسلامي امارت یې غږ کړی،چې له شپږم ټولګي پورته  د نجونو پر مخ ښوونځي پرانیزي.

هغه زیاته کړې:« د هرې ټولنې پرمختګ او سوکالي د هغې ټولنې د وګړو په پوهې، علم او زیار پورې مستقیما تړلې ده. پر اسلامي امارت غږ کوم،چې په ټول هېواد کې  د نجونو او هلکانو ته د زده کړو د زمینې د برابرولو ترڅنګ له شپږم ټولګي پورته د نجونو ښوونځي هم ژر تر ژره بېرته پيل کړي.» 

اختریزو پیغامونو کې پخوانیو ولسمشرانو دغه راز د نیوکې په توګه چې ظاهرآ هدف یې پاکستان ته افغاني صادرات دي،نیوکه کړې، چې د افغانستان صادرات په هغو پیسو کېږي، چې ورځ تر بلې خپل ارزښت او باور له لاسه ورکوي.

مخکېني ولسمشر غني په افغانستان کې په ملي یووالي، بحث، مناظرې او استدلال ټېنګار درلود او وې ویل، د ولس له  ارادې پرته حکومتونه دوام نه شي کولی.