سره له دې چې د افغانستان اسلاميامارت مرستیال ویاند قاري یوسف احمدي، په یو ټویټ کې دغه ادعاوې تبلیغات وبلل او په کلکه یې رد کړل،خو تازه د د افغانستان اسلامي امارت کورنیو چارو وزارت سرپرست وزیر سراج الدین حقاني په یو غږیز پیغام کې د امارت ټولو غړو توصیه کړې،چې په شخصي مسایلو کې له بیت المال استفاده ونه کړي.
حقاني د اسلامي امارت ټولو غړو ته توصیه کړې،چې مغرورانه حرکتونه دې نه کوي او داسې اعمال دې نه ترسره کوي،چې ولس خوا بدی کېږي.
حقاني زیاته کړې:« د دې لپاره،چې موږ هرچاته جوابګوی یو،په دې کې موږ به خپل مشرتابه ته څه ووایو؟ ملت ته به څه وایو؟ د دې لپاره له بیت المال سره ډېر پام کوئ. بې نهایته پام کوئ،داسې اعمال چې په ملت باندې ښه نه لګیږي او مغرورانه حرکتونه وي،له دې جدي وګرځئ او منع ترې وکړئ .»
حقانی دا هم ویلي، یوه وړه غلطي یې ټول صف بدنامولی شي او خپل ولس ته ځواب ویونکي دي.
هغه زیاتوي:« اوس داسې ځای ته موږ راغلو او د مادیاتو میدان ته موږ راګډ شو،دحکومت میدان ته راګډ شو اوس هر رقم نفسي خواهشات انسان مغلوب کوي. د دې له امله چې اوس یوه وړه غلطي چې کیږي،د جهاد ټول صف بدناموي او یقینآ چې اوس موږ خپل خوار ملت ته جواب نه لرو.»
اخوا د سیاسي چارو یو شمېر شنونکي بیا وايي، له پخوانیو چارواکو سره د اسلامي امارت توپیر همدا دی،چې دوی له دولتي وسایلو شخصي ګټې نه اخلي،خو اندېښنه لري،که په ټولنیزو رسنیو کې دهلیکوپټرې خپره شوې ویډیو حقیقت ولري او دغه کړنې دوام وکړي،نو ولس به له حکومته واټن واخلي.
د سیاسي چارو شنونکی سرور نیازی وايي:« د طالبانو او پخوانیو چارواکو ترمنځ چې یو ستر توپیر دی،هغه دادی،چې پخوانیو چارواکو به باډي ګاردان،له کوره سیمټي دیوالونه راتول کړي و او له دولتي وسایلو به یې استفاده کوله،خو دطالبان داسې نه دي او په ټولنیزو رسنیو کې خپره شوې ویډیو که ریښتیا وي، د امارت او خلکو ترمنځ به واټن پیدا کړي.»
