د کابل ښار د دیارلسمې او اته لسمې حوزې سیمه چې د دشت برچي په نوم پېژندل کیږي، خلک یې د هېواد د نورو سیمو په څېر، په ارامه فضا کې ژوند کوي، خپل کاروبارونه سمبالوي او له هر ډول امنیتي وېرې پرته تګ راتګ لري.
د دشت برچي اوسېدونکی حاجي ګل حسن محمدي وايي: « موږ دلته ژوند کوو، د خدای شکر دی امنیت او هرڅه برابر دي. موږ په خپلو جوماتونو او تکیه خانو کې مراسم نمانځو، عزاداري کوو مګر له کومې ستونزې سره مخ شوي نه یو. موږ به دې وړاندې ګاردان لرل، امنیت به نیولو، خو د اسلامي امارت په راتګ سره دا هرڅه له منځه تللي. دلته د جمهوریت له وخت څخه ډېر امنیت ټینګ دی.»
دوی له بهره کېدونکي هغه تبلیغات او شایعات په کلکه ردوي چې وايي، اوس په افغانستان کې د هزاره توکمه وګړو امنیت خوندي نه دی.
د دوی په خبره، هغوی چې دا ډول تبلیغات کوي، له حقایقو نه دي خبر او د هغو استخباراتي کړیو له خوا ګومارل شوي چې غواړي په افغانستان کې قومي او مذهبي تفرقه رامنځته کړي.
د برچي اوسېدونکی محمد حسین وايي: « د خدای شکر دی وطن کې سوله او امنیت ټینګ دی. دا خبره تبلیغات دی او د بهرنیو مزدوران یې کوي.»
د دې سیمې بل اوسېدونکی ګل حسن محمدي وايي: « دا چې وايي د هزاره ګانو نسل وژنه روانه ده، هسې پروپاګند دی، موږ په خپلو سترګو څه نه دي لیدلي.»
د دشت برچي اوسېدونکی اسماعیل سیفي وايي: « دا د ځینو کړیو عادت او تبلیغات دي. دوی د خلکو ترمنخ تفرقه اچوي او نه غواړي چې زموږ هېواد پرمختګ وکړي او آرامي ولري. پردې هېوادونه او د دوی اجیر شوي مزدوران دسیسې جوړوي او د خلکو هوسا ژوند ګډوډوي.»
د دشت برچي خلک وايي، اوس ښکاره حقیقت دا دی چې په ټول هېواد او په تېره بیا هغو سیمو کې امنیت چې هزاره توکم په کې ژوند کوي، د تېر نظام په پرتله څو برابره ښه دی. د دوی په خبره، اوس له هر ډول امنیتي وېرې پرته شپه او ورځ تګ راتګ کوي او په عادي ډول خپلې چارې سمبالوي.
د برچي اوسېدونکی شاه ولي حسیني وايي: « د خدای په فضل امنیت ډېر ښه دی، موږ له دې وړاندې د ماښام له شپږ بجو وروسته له کور نه شو راوتلی، اوس کولی شو ټوله شپه وګرځو او کار وکړو.»
د دې سیمې بل اوسېدونکی شفیق مرادي وايي: « موږ د امنیت په اړه هېڅ ډول ستونزه نه لرو او نه هم کوم خطر متوجه دی. د طالبانو په راتګ سره، امنیت ډېر ښه شوی.»
په کابل ښار کې روانه بیا روغونه او په اساسي ډول د سړکونو او کوڅو جوړول هغه څه دي چې خلک ترې خوښ دي.
کابل ښار د لوېدیځو سیمو او چهاردهي اوسېدونکي وايي، نه یوازې دا چې امنیت یې تامین شوی بلکې ورسره جوخت عامه خدمات هم ورته وړاندې کیږي. دوی زیاتوي، د معیاري سړکونو جوړول د دې لال شوي چې ناروغان پر وخت روغتون ته ورسول شي او له یوې سیمې بلې ته په کمه موده کې سفر وکړي؛ همدارنګه یوازې د څو ساعتونو په تېرېدو سره خپلې ټولې سوداګریزې اوعادې چارې را ونغاړي.
د برچي اوسېدونکی شاه ولي حسیني وايي: « د سړکونو جوړولو په برخه کې هم ښه کار شوی. یو وخت به دا سړک(میرویس میدان – پل سوخته) د ګڼه ګوڼې له امله بند و، خو اوس یې ترڅنګ نور سړکونه جوړ شوي او دا سړک فرصت دی. همدارنګه د سړکونو له جوړېدو سره حادثې هم کمې شوې دي.»
د اسلامي امارت دریځ بیا دا دی چې په هېواد کې موجوده نظام د اسلامي شریعت له مخې منځته راغلی او په شریعت کې تبعیض نا روا عمل دی.
د اسلامي امارت د چارواکو په خبره، هېواد کې شته ټول قومونه او پرګنې د اسلامي شریعت له مخې یو ډول حقوق لري او دوی ته حکومتي خدمات که په هره برخه کې وي، په یو ډول وړاندې کیږي.
