د امریکا څېړنو فډرالي ادارې( اېفبيآی) یو ځل بیا د افغان توکمه امریکايي، محمود شاه حبیبي د ورکېدو په اړه د معلوماتو موندنې لپاره اعلامیه خپره کړه.
په اعلامیه کې د تېر کال ادعا یو ځل بیا تکرار شوې او ویل شوي چې محمود شاه حبیبي او د هغه موټر چلوونکی د ۲۰۲۲زېږدیز کال د اګست له لسمې راهیسې په کابل کې له نیول کېدو وروسته لادرک دی.
اېفبيآی د یوې مطرح شوې ادعا پر بنسټ، نوموړی د اسلامي امارت د استخباراتو عمومي ریاست له خوا نیول شوی بللی او د هغه د موندنې، موقعیت معلومولو او کور ته د راستنولو لپاره یې اعلان شوې پنځه میلیون ډالر جایزه بیا ځل یاده کړې ده.
په اعلامیه کې زیاته شوې: « د څېړنو فډرالي ادارې(اېفبيآی) د ۲۰۲۲ زېږدیز کال په اګست میاشت کې په افغانستان کې د محمود شاه حبیبي د ورکېدو په اړه د معلوماتو په لټه کې ده. حبیبي د افغانستان د ملکي هوايي چلند پخوانی رییس، د افغانستان په پلازمېنه کابل کې له خپل کور سره نږدې نیول شوی او ادعا کېږي چې د طالبانو استخباراتو ریاست له خوا د خپل موټروان او د اسیا مشورتي شرکت چې په کابل کې مېشت مخابراتي شرکت دی، له ۲۹ نورو کارمندانو سره یو ځای نیول شوی دی.»
د دې ترڅنګ، د افغانستان لپاره د متحده ایالتونو ماموریت هم پرخپله اېکس پاڼه د محمود شاه حبیبي پر راخوشي کولو او موندنې ټينګار کړی.
د یاد ماموریت په خبرپاڼه کې راغلي، امریکا د محمود شاه راخوشي کولو او کور ته ستنولو لپاره خپله ژمنتیا ساتي او د دې چارې لپاره به اړین ګامونه پورته کړي.
د افغانستان لپاره د امریکا ماموریت په خبرپاڼه کې راغلي: « نن د امریکايي وګړي محمود شاه حبیبي د ورکېدو څلور کاله پوره کېږي. هېڅ دلیل نه سترګو کېږي چې ګواکي دا موضوع دې حل نه شي. موږ لا تر اوسه د محمود کور ته د راستنولو او د هغه د بېرته راستنېدو لپاره د اړینو ګامونو اخستو ته چمتو یو.»
اسلامي امارت د امریکا دې ادعا ته په غبرګون کې وايي چې دا خبره یې څو ځله په ډاګه کړې چې د محمود شاه حبیبي په نوم کوم کس د اسلامي امارت په اړوند ادارو کې نه دی بندي شوی.
داسلامي امارت ویاند ذبیح الله مجاهد وايي: « لومړۍ خبره دا ده چې حبیبي له موږ سره نه شته، دا خبره موږ په کراتو دوی ته په مجلسونو کې هم کړې او اعلان مو کړی چې د حبیبي په نوم موږ هېڅ بندي نه لرو.»
شنونکي، د امریکا له خوا پر یو افغان توکمه امریکايي د جایزې اعلان او د هغه په اړه له شواهدو پرته ادعاوې د واشنګټن سیمه ییزې سیاسي موخې ګڼي.
دوی وايي، امریکا تل په سیمه کې د خپلو ګټو د تعقیب لپاره هغه ډول پلمې لټوي چې د نړیوالو قوانینو او ډېپلوماټيکو ارزښتونو سره اړخ نه لري.
د سیاسي چارو شنونکی عزیز معارج وايي: « امریکا له دې څخه یوه کیسه جوړوي او تر شا یې یو هدف پروت دی. دوی غواړي پر طالبان فشار راوړي او د دې لپاره څه علت په کار دی. که دوی غواړي په حقیقت ځان پوه کړي، نو را دې شي او زندانونه دې وګوري. دلته ځینې دښمنان او ډلې ټپلې ناوړه ګټه هم اخلي.»
اسلامي امارت له امریکا سره د افغان بندیانو په تبادله کې له تېر کال راهیسې څلور امریکايي بندیان، رایان کوربېټ، ویلیام مک کېنټي، جورج ګلېزمان او ډېنس کویل خوشي کړي، خو د محمود شاه حبیبي د نېونې په اړه یې د امریکا مطرح شوې ادعاوې بې بنسټه بللې دي.
