د افغان سولې لپاره د امریکا ځانګړی استازی زلمی خلیلزاد نن سهار د چین پلازمېنې بېجینګ ته رسېدلی دی.
خلیلزاد پخپل ټوېټر لیکلي، هلته به له چینايي چارواکو سره وګوري او افغان سولې په تړاو به ورسره خبرې وکړي.
خلیلزاد ویلي، په دغه لیدنه کې به دواړه خواوې بحث وکړي چې څنګه کېدای شي په افغانستان کې سوله راولي.
له دې سره خلیلزاد په دوبۍ کې د افغانستان د ملي امنیت سلاکار سره لیدلي.
د ملي امنیت سلاکار حمدالله محب چین ته له سفر وروسته سعودي عربستان ته تللی.
محب له سعودي وړاندې په ابو ظبۍ کې د متحده عرب اماراتو د ملي امنیت شورا سلاکار شیخ طحنون بن زاید النهیان سره او دغه راز د افغان سولې لپاره د امریکا د بهرنیو چارو وزارت ځانګړي استازي زلمي خلیلزاد سره په دوبۍ ښاره کې جلا جلا کتلي دي.
په دې جلا جلا کتنو کې د افغانستان د سولې په تړاو خبرې شوي چې باید د افغانانو په رهبرۍ او مالکیت ترسره شي.
ټاکل شوې، محب په سعودي عربستان کې د دغه هېواد له لوړپوړو چارواکو سره هم په افغانستان کې د سولې او دوه اړخیزو همکاریو په تړاو خبرې وکړي.
له طالبانو د ازبکستان غوښتنه
ازبکستان ویلي، طالبان باید له افغان حکومت سره خبرې وکړي.
د ازبکستان بهرنیو چارو وزیر عزیز کاملوف ویلي، طالبان باید له افغان حکومت سره مذاکرات پیل کړي او دوی هم د افغانانو په مالکیت او رهبرۍ د سولې له پروسې ملاتړ کوي.
دغه راز کاملوف ویلي، هېواد یې د افغان سولې برخه کې د سیمه ییزو او نړیوالو هېوادونو له هڅو ملاتړ کوي.
خو طالبان بیا تل له افغان حکومت سره له مذاکراتو ډډه کوي او باور لري چې افغان حکومت د خبرو او سولې کولو صلاحیت نه لري.
