Skip to content
د افغانستان پکتیکا او خوست ولایتونو د زلزلو له قربانیانو او ټپیانو سره د امریکامتحده ایالتو د ۵۵ میلیون ډالررو بشري مرسته اعلان کړې ده
د یاد هېواد بهرنیو چارو وزارت وزیر انټونیو بلېنکن ویلي، چې دا مرسته یوازې د زلزلې قربانیانو لپاره ده.
هغه زیاته کړې:« د امریکا متحده ایالات به د جون د ۲۲ نیټې له زلزله ځپلو افغانانو سره نږدې ۵۵ میلیونه ډالر بشري مرسته وکړي.»
پيښو ته د رسیدو په چارو کې د دولت وزارت ویاند نسیم حقاني بیا وايي، دوی اړمنو کسانو ته مرسته رسولې او د مرستو ډېره برخه يې د بې سرپناه خلکو لپاره د خوندي ځایونو او سرپناوو جوړولو ته ځانګړې کړې ده.
هغه زیاته کړه:« تر اوسه پورې د خوراکي او غیر خوراکي توکو مرستې شوي دي. د دې خلکو ( زلزله ځپلو) لپاره د سرپناه جوړولو په موخه بودیجې ته اړتیا ده. ملي او نړیوالو موسسو،چې د مرستو کومې ژمنې کړي دي، هغو مرستو ته زلزله ځپلي په تمه دي،چې هغه راورسېږي او د هغوی د دایمي سرپنا غم وخوړل شي.»
د چارو شنونکي د یادو مرستو په تړاو بیا وايې، د امریکا متحده ایالتو دوه ډوله مرستې اعلان کړې،چې یوه برخه يې د اوچا ادارې له لوري ویشل کیږي او بله برخه مرسته یې له هغو پيسو ده، چې د امریکا متحده ایالتو حکومت له خوا کنګل اعلان شوې وې.
دوی په دې باور دي،چې دغه ډول مرستې باید په مستقیم ډول د افغانستان سرې میاشتې ټولنې سره شریکې شي.
د پکتیکا او خوست زلزله ځپلو سره د امریکا له متحده ایالتو سربېره، چین، قطر، ازبکستان، ایران، هند، پاکستان، ټایوان او سویلي کوریا هېوادونو نغدي او غیر نغدي مرستې کړي،چې تراوسه پورې یې نیمايي برخه هم اغیزمنو کورنیو ته نه دي رسیدلي.
د خوست او پکتیکا وروستۍ زلزله کې نږدې ۱۵۰۰ کسان مړه او له ۲ زرو زیات ټپيان شوي دي.
