ټاکل شوې چې د روانې زمري میاشتې په شلمه نېټه دکرنې او مالدارۍ خونې په نوښت په لومړي ځل په کابل کې د کرنیزو او مالدارۍ تولیداتو نړیوال نندارتون جوړیږي چې د مسولانو په خبره، شپږ ورځې به دوام وکړي.
د دې نندارتون موخه نندارې ته دکورنیو تولیداتو د وړاندې کولو ترڅنګ، په یادو برخو کې د پانګونې جلب او همدا راز نړیوالو بازارونو ته د افغاني تولیداتو معرفي کول دي.
د کرنې او مالدارۍ تولیداتو خونې رییس خان محمد فروتن وايي: « له دې نندارتون څخه زموږ موخه یوازې د افغانستان د محصولاتو معرفي کول نه دي بلکې د تجارت، صادراتو، پانګونې، تولیدوونکو ترمنځ همکاریو او د نړۍ له مختلفو هېوادونو سره د اړیکو پراخولو لپاره د زمینې برابرول هم دي.
چارواکي وايي، په دې نندارتون کې به د روسیې، هند او ایران ترڅنګ، د ترکیې او ازبېک پانګوال هم ګډون وکړي او افغاني تولیداتو له کیفیت به له نږدې خبر شي.
په ورته مهال روسي پانګوال وايي، هوډ لري چې دکرنې په برخه کې به افغانستان کې پانګونه وکړي او موخه یې هم خلکو ته کارموندنه او د افغانستان اقتصادي وده ده.
یو تن روسي پانګوال ګور اکو پویچ وايي: « په افغانستان کې موږ سروې کړې او دې پایلې ته رسېدلي یو چې د افغانستان د کرنې برخه کې پانګونه وکړو او د دې ترڅنګ، په افغانستان کې د اوړو د تولید یوه فابریکه هم جوړه کړو.»
په ورته مهال، د صنعت او سوداګرۍ وزارت د نندارتونونو جوړولو ریاست وايي، دا نندارتون د کورنیو تولیداتو د کیفیت او تولیدي کچې په لوړولو کې مهم رول لري او په دې برخه کې به بهرنيو او کورنیو پانګونې ته زمینه برابره کړي.
د صنعت او سوداګرۍ وزارت د نندارتونونو جوړولو رییس یعقوب جاوید وايي: « دا نندارتون به د با کیفیته کورنیو توکو د معرفي کولو ترڅنګ، د تجروبو د تبادلې، د سوداګریزو همکاریو پراختیا، کرنې او مالدارۍ په سکټور کې د پانګونې هڅولو لپاره یو غوره فرصت وي.»
کرنې او مالدارۍ تولیداتو خونې چارواکو له خلکو وغوښتل چې د کرنیزو او مالدارۍ تولیداتو د ملاتړ په موخه په دې شپږ ورځیني نندارتون کې ګډون وکړي.
دغه نندارتون چې د اسد یا زمري میاشتې په شلمه نېټه جوړیږي، شپږ ورځې به دوام وکړي او په ۵۰۰ غرفو کې به د افغانستان د کرنیزو او مالدارۍ تولیدات په کې نندارې ته وړاندې شي.
