Skip to content
د افغانستان اسلامي امارت د بهرنیو چارو وزارت د ملګرو ملتونو امنیت شورا له هغې پریکړې هرکلی کړی دی،چې تازه یې د اسلامي امارت د یوشمیر مشرانو پر سفرونو لګیدلي بندیزونه د دوو نورو میاشتو لپاره هم لرې کړل.
بهرنیو چارو وزارت د ویاند مرستیال ضیاء احمد تکل وايي، دا د افغانانو حق دی،چې بهرني سفرونه ولري او د دوحې هوکړې ژمنې له مخې باید د افغان چارواکو پر سفرونو لګیدلي بندیزونه د تل لپاره لرې شي.
تکل زیاته کړه:« د ملګرو ملتونو دغه وروستی اقدام،چې د اسلامي امارت په یوشمیر لوړ رتبه غړو لګیدلي بندیزونه یې د څه وخت لپاره لرې کړي دي هرکلی کوي او دا خپل حق ګڼي چې دا بندیزونه لکه څنګه چې د دوحې په توافقنامه کې ژمنه شوې وه،د ټول وخت لپاره لرې شي.»
خو د لوړو زده کړو سرپرست وزیر عبدالباقي حقاني او د پوهنې وزارت مرستیال هغه دوه چارواکي دي،چې ترنامالوم وخته د دوی پر بهرنیو سفرنو تازه بندیزونه لګېدلي دي.
تکل دغه بندیزونه فشار یادوي او زیاتوي،چې دغه ډول فشارونه ازمایل شوي او تکراري تجربې دي،چې پایله به ورنه کړي او ملګري ملتونه دې نور له یو اړخیزو قضاوتونو لاس واخلي.
تکل زیاته کړه:« په دوو نورو لوړرتبه غړو تازه بندیزونه لګول شوي دي. د بهرنیو چارو وزارت پر اسلامي امارت دا ډول فشارونه بې ګټې او د ازمایل شویو ناکامو تجربو تکرار بولي،چې هیڅ نتیجه به ورنه کړي. اسلامي امارت د ملګرو ملتونو له امنیت شورا غوښتنه کوي،چې نور یو طرفه قضاوت ونه کړي او د افغانانو حقوق ورکړي.»
د سیاسي چارو کارپوهان بیا وايي، د ملګرو ملتونو له لوري د لنډ مهال لپاره د اسلامي امارت د یوشمیر چارواکو له سفرونو بندیزونه لرې کولو موخه د نړۍ او اسلامي امارت ترمنځ د شته ستونزو حل ده،چې باید په یاده موده کې پرې کار وشي.
خو په ورخت کې دوی بیا وايي، د لوړو زده کړو پر سرپرست وزیر او د پوهنې وزارت پرمرستیال د تازه بندیزونو لګول اسلامي امارت ته د نړۍ ښکاره پیغام دی،چې پرهغو ټولو به نړیوال بندیزونه ولګول شي،چې افغانانو سره شخړې زیاتوي.
د سیاسي چارو شنونکی حکمت الله حمکت وايي:«دا په حقیقت کې د امنیت شورا یو مثبت ګام دی،ترڅو چې افغانانو او نړۍ له یوبل سره بحث ته داخل نه شي، د افغانستان ستونزه د حل لار نه شي موندلی. ولې په هغې برخې باندې چې د افغانانو د حقوقو تر پښولاندې کولو کې مستقیم لاس لري، خصوصآ د نجونو د ښوونځیو په بندولو کې د دوی دخالت واضع دی، پر هغو باندې بندیزونه په حقیقت کې د اسلامي امارت دمشرتابه هغې برخې ته واضع پیغام دی،چې غواړي افغانانو سره شخړې زیاتې کړي او د بشر حقوق تر پښولاندې کړي. حقیقت دادی،چې ملګرو ملتونو بیا هم موقع ورکړېؤچې هغه ستونزې چې اسلامي امارت نه دي حل کړي حل یې کړي،چې په راتلونکي کې نه یوازې بندیزونه لرې شي،بلکې په امنیت شورا د اسلامي امارت استازی هم ځای ولري او موږ به رسمي مشروعیت هم پیدا کړو.»
له هغې وروسته،چې په دوحه کې اسلامي امارت ته سیاسي دفتر پرانېستل شو له امریکا سره د مذاکراتو لپار یې پر ځینو مشرانو د سفرونو بندیزونه هم لرې شول،خو په دې وروستیو کې د بشري حقونو د نړیوالو ادارو له لوري غوښتنه داوه،چې باید یوځل بیا د اسلامي امارت د چارواکو پر سفرونو بندیزونه ولګول شي،خو برعکس درې میاشتې بیا وخت ورکړل شول،چې د اسلامي امارت چارواکي کولای شي،رسمي سفرونه وکړي،خو اوس دغه وخت هم په پایته رسیدو دی.
