افغان ځواکونو تېره شپه د بادغیس ولایت په جوند ولسوالۍ په پنج بز سیمه کې د طالبانو په محبس برید کړی دی، چې ۱۹ طالبان او د داعش درې اندونیزیايي او مالیزیايي غړي وژل شوي دي.
د داعش دغه بهرني غړي له زیات وخت راهیسې تر تقیب لاندې و.
برید کې د طالبانو ۲۰ او د داعش ۱۵ غړي ټپیان شوي دي.
د طالبانو یو ویاند قاري یوسف احمدي بیا ویلي چې د تېرې شپې په برید کې ۴۰ داعش جنګیالي د طالبانو له زندانه خوشې شوي دي.
احمدي په یوې اعلامیې کې ویلي چې په برید کې د طالبانو دوه پیره داران هم وژل شوي دي.
افغانستان کې د طالبانو وروستۍ مرګ ژوبله
کندز
د کندز امام صیب ولسوالۍ کې د جګړې په مهال دوولس طالبان وژل شوي او شپږ نور ټپیان شوي دي.
د شلمې فرقې له لوري خپره شوې اعلامیه کې راغلي چې دغه نښته د امام صیب ولسوالۍ کونجک او قرغزو سیمو کې شوي دي.
اعلامیه کې دا هم راغلي چې نښته کې دوه افغان سرتیري وژل شوي او درې نور ټپیان دي.
بلخ
د بلخ د زارع ولسوالۍ لپاره د طالبانو نومول شوی ولسوال له ۱۱ نورو وسله والو سره وژل شوی دی
. شمال کې د ۲۰۹ شاهين قول اردو مطبوعاتي دفتر وايي، د طالبانو نومول شوی ولسوال قاري قدرت الله او دهغه یوولس نور ملګري تیره ورځ د شولګر کندلي سیمه کې په هوايي برید کې وژل شوي دي.
سرچېنې لیکلي، دغه هوايي برید کې د طالبانو دوولس عرادې موټر سایکلونه او د هغوی وسلې هم له منځه تلي دي.
طالبانو تر اوسه په دې اړه رسنیو ته څه نه دي ویلي.
فاریاب
فاریاب کې د عملیاتو په مهال طالبانو ته درنه مرګ ژوبله اوښتې ده.
شمال زون کې د دوه سوه نهه شاهین قول اردو له لوري خپره شوې اعلامیه کې راغلي چې خواجه سبز پوش ولسوالۍ کې د عملیاتو په مهال شل طالبان وژل شوي، پنځلس ټپیان او دولس نور نیول شوي دي.
د سرچېنې په لیکنه د وژل شویو په ډله کې یو هم د طالبانو مشهور قوماندان قاري تاج الدین هم شامل دی.
شاهین قول اردو لیکلي په دغو عملیاتو کې له هوايي ځواک هم کار اخیستل شوی دی.
طالبانو تر اوسه د شوې ادعا په اړه رسنیو ته څه نه دي ویلي.
زابل
زابل کې د دوو مهمو طالب قوماندانانو په ګډون اته وسله وال وژل شوي او ۱۳ نور ټپيان دي
د ارغنداب ولسوال امیر جان الکوزی وايي، جګړه تېره شپه ۲۰۰پیل او د سهار تر شپږو بجو یې دوام وکړ.
د ولسوال امیر جان په خبره، دغو بریدونو کې اته طالبان او یو پولیس وژل شوي، ۱۳ وسله وال او دوه پولیس ټپيان دي.
د ولسوال په خبره په وژل شویو کې دوه طالب قوماندانان، اصف زابلوال او نویدیار هم شامل دي.
طالب وسله والو تر اوسه دغې ادعا ته کوم غبرګون نه دی ښودلی.
