کابل؛ د افغانستان پلازمېنې هغه ستر ښکلی ښار چې شاوخوا ۶ میلیونه وګړي په کې ژوند کوي.
په دې ښار کې ډېری وخت هېوادوال د موټرو د زیاتوالي، لاربندۍ، بېځایه د موټرو درېدل هغه ستونزې یادوي چې په خبره یې تر دې دمه د دې ستونزې حل ته منظمه حل لاره نه وه موندل شوې او له همدې امله خپلو دندو او چارو ته پر وخت نه شو رسېدلی.
د همدې ستونزو د هواري په موخه، کابل ښاروالۍ د ښار په بېلابېلو برخو کې د هوايي پلونو د جوړولو چارې پیل کړې دي.
د ښاروالۍ مسوولین د ښار په بېلابېلو برخو کې د هوایي پلونو د کاري چارو له چټکېدو خبر ورکوی.
د کابل ښاروالۍ استازی نعمتالله بارکزی وايي: « د برکي هوايي پل چې تېر کال یې چارې پيل شوې وې، اوس یې د زېر ګذر چارې ۸۵ سلنه او د هوايي پله چارې شاوخوا ۵۰ سلنه پرمخ تللې دي. زموږ د کاري پلان له مخې باید دا پل په دوو کالو کې بشپړ شي، یانې د ۱۴۰۶ کال د غوايي یا ثور په میاشت کې باید ګټه اخستنې ته وسپارل شي. همدارنګه د سالنګ واټ پل کارونه هم ۶۰ سلنه پرمخ تللي دي.»
په ورته مهال، کابل مېشتي د کابل ښاروالۍ له روانو فعالیتونو خوښي څرګندوي او له ښاروالۍ غواړي چې د هوايي پلونو ترڅنګ، نورې بنسټیزې او پراختیايي پروژې هم پلې کړي، ترڅوپه دې برخه کې د خلکو لومړنیو ستونزو ته رسېدنه وشي.
د کابل ښار اوسېدونکی حسین احمد وايي: « د ښاروالۍ له مسوولینو مننه کوو چې دا پلونه جوړوي، له دې سره به بیروبار کم شي. بله ښه خبره دا ده چې په دې پلونو کې ډېرو خلکو ته د کار زمینه هم برابره شوې.»
د کابل اوسېدنکی شاکرالله وايي: « ښاروالۍ ډېر ښه کارونه روان کړي او خلک ترې راضي دي. باید دا ډول پروژې لا ډېرې او خلکو ته د کار زمینه برابره کړي.»
د کابل ښاروالۍ له خوا د نجات څلي په ساحه کې د جوړېدونکي هوایي پله مسوولین وایي، اوس مهال د یاد هوايي پل د جوړېدو په چارو کې له ۱۵۰څخه تر۱۸۰ تنو کارګران په کار بوخت دي چې له دې سره یو شمېر هېوادوالو ته د کار زمینه هم برابره شوې ده.
د دې پروژې مسوول احسان الله ناصري وايي: « په دې سره به زموږ هېوادوالو ته په تګ راتګ کې ډېره اسانتیا رامنځته شي. موږ د دې پله کارونه تازه پيل کړي او هوډ لرو چې له راکړل شوي وخت وړاندې یې بشپړه کړو. په دې پروژه کې له موږ سره اوسمهال تر ۱۸۰ تنو پورې کار کوي.»
د کابل ښاروالۍ د مسوولینو په خبره، ټاکل شوې نږدې راتلونکي کې د هنګرونو شهید څلور لارې، د کابل هوايي ډګر څلور لارې او دغه راز د پنځمې حوزې د کمپنۍ په څلور لارې کې هم د پلونو جوړولو چارې پيل شي.
