Skip to content
د جون ۲۰ مه هر کال د کډوالو نړیوالې ورځې په توګه نمانځل کیږي،چې سږکال د همدې ورځې په مناسبت د بښنې نړیوال سازمان، په خپله خپره کړې خبرپاڼه کې د افغان کډوالو وضعیت د اندېښنې وړ یاد کړی دی.
په خبرپاڼه کې د ځینو هېوادونو نومونه اخیستل شوي، چې افغان کډوال په کې خپلو حقونو ته لاسرسی نه لري، ځورول کیږي او په زور شړل کیږي.
یاد سازمان ویلي، چې د افغان کډوالو پر وړاندې دې تاوتریخوالی بند شي.
د بښنې نړیوال سازمان د خبرپاڼې یوه برخه:«له بده مرغه په ایران، پاکستان، ازبکستان، تاجکستان، ترکیې او مالیزیا کې ګڼ افغان کډوال د نړیوالو قوانینو له مخې له خپلو حقونو برخمن نه دي. هغوی سره تاوتریخوالی او بد چلن کېږي او بېرته افغانستان ته په زور استول کېږي.»
د ملګرو ملتونو د کډوالۍ نړیوالې ادارې هم د افغان کډوالو پر وضعیت اندېښنه ښودلې او له دوی سره یې د مرستې غوښتنه کړې ده.
یادې ادارې زیاته کړې:« د نورو پناه غوښتونکو په ګډون ۴ میلیونه افغانان له خپل هېواده بهر ملاتړ ته اړتیا لري. افغانستان کې د بشري مرستو د فعالیتونو کچه کمه شوې ده.»
د نړیوالو راپورنو پر بنسټ، په وروستیو لسو میاشتو کې نا امنۍ او بې وزلۍ لسګونه زره افغانان جلا وطنۍ ته اړ کړي،چې یوازې دوه نیم سوه زره کسان پاکستان ته تللي، تر دې زیات نور ایران او یو شمیر اروپايي هېوادونو ته وتلي دي.
خو اسلامي امارت بیا تازه ویلي، په یاده موده کې اووه سوه زره افغانان هېواد ته راګرځیدلي دي.
