پخواني ولسمشر حامد کرزي له افغان هندوانو او سېکانو سره خپله خواخوږي ښودلې او د دغه برید عاملین یې د افغانستان دښمنان بللي دي.
کرزي زیاته کړې:« د اهل هنود او سیک هېوادوالو پر معبد ترهګریز برید پر کلکو ټکو غندم، د دغه برید عاملین د هېواد د سولې او ثبات او ګرانو هېوادوالو، دښمنان دي.»
د مخکېني حکومت د ملي روغې جوړې عالي شورا مشر ډاکټر عبدالله عبدالله هم، پر خپله ټویټر پاڼه، سیکانو ته تسلیت ویلی او د برید غندنه یې کړې ده.
د افغانستان اسلامي امارت ویاند ذبیح الله مجاهد هم د دغه برید غندنه کړې او ډاډ یې یې ورکړی، چې عاملین به یې سخت مجازات کړي.
هغه زیاتوي:« اسلامي امارت په کابل کې د افغان ولس د دښمنانو لخوا د اهل هنود هېوادوالو عبادتګاه په نښه کول پر کلکو ټکو غندي. اسلامي امارت د پېښې د قربانیانو له کورنیو سره خپله خواخوږي څرګندوي او د دې جنایت د عاملینو د پېژندنې او مجازاتو لپاره د جدي اقداماتو ډاډ ورکوي.»
له افغان سیاسیونو او حکومت سربېره ګڼو نړیوالو بنسټونو او سیاسي څیرو کابل کې د سیکانو پر معبد برید غندلی او د بې ګناه وګړو په نښه کول یې بشري جنایت یاد کړی دی. دغه برید کې د دوه بریدګرو په ګډون یو افغان سیک او یو طالب سرتیری وژل شوي او اووه نور ملکي وګړي ټپیان دي.
