د بشري حقونو نړیوال سازمان په خپل تازه راپور کې اندیښنه ښودلې وه،چې په افغانستان کې د بشري حقونو وضعیت ښه نه دی او که وضعیت په همدې توګه دوام وکړي،لا به خراب شي.
د بشر حقونو سازمان د نجونو زده کړو او ښځو د کار موضوع ته هم اشاره کړې وه،چې په افغانستان کې پرې بندیزونه لګیدلي دي او همدا راز ماشومان د اقتصادي ستونزو له امله درانه کارونه کوي .
خود افغانستان اسلامي امارت ویاند ذبیح الله مجاهد بیا وايي، نه یوازې دا چې بشري حقونو وضیعت نه دی خراب شوی،بلکې د تیر پرتله ښه شوی دی.
مجاهد وايي، د تیر کال پرتله بشري حقونو وضعیت څو برابره ښه دی،خلک نه وژل کیږي، بې ګناه زندانونو ته نه ځي، پر کورونو بمبار او چاپې نشته دی او د ښځو او ماشومانو ژوند خوندي دی.
مجاهد زیاته کړه:« اسلامي امارت هغه ادعاوې ردوي،چې ګواکې په افغانستان کې د بشر حقوق ضایع شوي او یا د بشر حقون نه ورکول کېږي. اصلي موضوع دا ده، که چېرې تاسې د تېر کال دې ورځو د بشر حقوق پرتله کړئ، ډېر توپیر لري. تېر کال دلته د خلکو ژوند اهمیت نه درلود. د خلکو پر کورونو بمبارونه کېدل. خلک بې ګناه زندانونو ته وړل کېدل. زرګونه افغانان په زندانونو کې ول. هغه د بشر حقونه ډېر ضایع کېدل، د هغوی ماشومان، ښځې او کورنۍ په ماتم ناستې وي. اوس داسې هېڅ نه لرو، بغیر له مجرمینو بل داسې زنداني نه لرو. د خلکو امنیت خوندي دی. لویو لارو کې تګ راتګ په اسانۍ کېږي.»
