بلخ ته د هغو پنځه تنو ځوانانو جنازې را ورسېدې چې ایران ته پر قاچاقي لارو د تګ پرمهال یې له تندې او ګرمۍ ژوند بایللی و.
یاد کسان چې د بلخ ولایت د چمتال ولسوالۍ میرقاسم جان کلي اوسېدونکي وو، شاوخوا یوه اوونۍ وړاندې ایران ته د سفر پرمهال د نیمروز په شګلنه دښته کې یې د سختۍ ګرمۍ له امله ژوند له لاسه ورکړی.
د قربانیانو کورنۍ چې د غم او درد دروند بار یې پر اوږو پروت دی وایي، بېوزلۍ او بې کارۍ دېته اړ ایستلي وو چې د کورنۍ درې غړي یې د پردي وطن د مزدورۍ په هیله له کوره ووځي.
خو د رزق ګټلو او هیلو پوره کېدو په ځای یې بېرته له ارمانونو ډکې جنازې کور ته راوګرځېدې. د دوی په وینا، بېوزلۍ تر دې حده لاسونه ور تړلي وو چې آن د خپلو عزیزانو د جسدونو د را لېږد او تدفین توان یې هم نه درلود او دا کار هم د دوی کلیوالو کړی.
د دوتنو قربانیانو پلار نېک محمد وايي: « زه پنځه بچي لرم چې یو یې اووه کلن دی، یو یې ۲۵ او بل یې ۲۳ کلن دی. دا دوه زامن مې ایران ته په مزدورۍ تلل او د لارې مصارف مې ورته له بل چا قرض کړل. څو ورځې وروسته مې ټیلفون ورپسې وکړ، خو ټیلفون یې بل چا پورته کړ او راته یې وویل چې د دې کسانو مړي یې د نیمروز په دښتو کې پیدا کړي.»
د یادو کسانو جنازې د میرقاسم جان کلي په هدیره کې یوځای خاوروته وسپارل شول.
د کلي اوسېدونکي وايي، دوی له ۱۴ نورو ځوانانو سره غوښتل د مزدورۍ لپاره په غیرې قانوني ډول ایران ته لاړ شي چې د موټړ خرابېدو له امله په دښته کې ایسار او د ګرمۍ شدت، لوږې او تندې له کبله یې خپل ژوند له لاسه ورکړی.
