د امریکا کانګرېس ته هغه طرحه وړاندې شوه چې له مخې یې د افغانستان په ګډون د نړۍ ۳۹ هېوادونو اتباع نهشي کولی، نور دې هېواد ته ورشي.
د امریکا استازو جرګې ته د جمهوريت غوښتونکي ګوند غړې داسې طرحه وړاندې کړې ده چې له مخې به یې د درېیمې نړۍ هېوادونو اتباع دا اجازه ونهلري چې دې هېواد ته لاړ شي. نانسي مېس دغه طرحه د درېیمې نړۍ د کډوالو د ځنډ قانون په نوم نومولې.
د امریکا استازو جرګه کې د جمهوري غوښتونکي ګوند دغې غړې ویلي: « د امریکا خلک نور له دې لوبې سخت ستړي شوي چې ټولې نړۍ د واشنګټن خوا ته سترګې پټې کړې دي. ځینې ناوړه کسان زموږ خاورې او هېواد ته را دننه کېږي او زموږ د نظام له هرې تشې څخه ناوړه ګټه پورته کوي. تاسې پوهېږئ چې د دې ګټې لویه بیه بېرته زموږ خلک پرې کوي. زه په ښکاره وایم، نور هغه ورځ پای ته رسېدلې چې د درېیمې نړۍ وګړي به امریکا ته را دننه کېږي.»
نوموړې په امریکا کې د دننه هغه سیاسي کړۍ هم ننګولې ده چې هڅه کوي امریکا ته د نورو هېوادونو اتباع راولي.
د هغې په خبره، دا ډول خلک یا کړۍ هڅه کوي چې امریکا هم ورو ورو په درېیمۍ نړۍ بدله شي.
نانسي مېس په دې اړه ویلي: « هغوی چې امریکا ته د درېیمۍ نړۍ اتباعو د راتګ په تړاو وخت ناوخت څرګندونې کوي، خبر ورکوم چې نور ستاسې هڅې ځای نهنیسي. د درېیمې نړۍ خلک هېواد ته راوستل، خپل هېواد په درېیمۍ نړۍ بدلول دي. زموږ نوې طرحه په روښانه ټکو ووایي چې امریکا ته ننوتل یو امتیاز دی، نه یو حق.»
د امریکا استازو جرګه کې د جمهوري غوښتونکي ګوند غړې همدارنګه ویلي چې د درېیمۍ نړۍ له هېوادونو یې په ځلونو غوښتي و چې د خپلو اتباعو په تړاو هر اړخیز معلومات ورسره شريک کړي، خو له بیا بیا هڅو سره سره یې دا څه له پامه غورځولي.
د کډوالو حقونو فعالان بیا د امریکا تازه پرېکړه د نړیوالو قوانینو او اصولو خلاف بولي او وایي، له دې سره به د هغو کډوالو د تګ لړۍ لا سخته شي چې دې هېواد ته د تللو تکل لري.
د کډوالو حقونو فعال ګلا خان بهادري وايي: « د امریکا کانګرېس ته د دې طرحې وړاندې کېدل د نړیوالو بشري ژمنو او د کډوالو د حقونو لپاره یوه جدي ننګونه ده. دا ډول پرېکړې هغه زرګونه افغانان چې د جګړو له امله کلونه کېږي چې د قانوني تګ په تمه دي، له نا څرګند برخلیک سره مخامخوي.»
د کډوالو حقونو فعال عبدالرازق عدیل وايي: « دا وضعیت د امریکا د ملي امنیت او د بشري حقونو په تړاو د نړیوالو تعهداتو ترمنځ ټکر څرګندوي. د امریکا دولت د خپلو اجرايي اختیاراتو له لارې خپلې پولې د افغانانو پرمخ تړلې دي، ترڅو لا ډېر امنیتي کنټرول اعمال کړي.»
د امریکا کانګرېس ته په نوې وړاندې شوې طرحه کې د افغانستان په ګډون د ایران، سوریې، یمن، لیبیا، سومالیا، سوډان، وېنزوېلا، نایجیریا او لسګونو نورو هېوادونو پر اتباعو بندیز لګول شوی، ترڅو نور دغه هېواد ته دننه نهشي.
