د چین رول د افغان سولې په اړه څومره اغیزمن تمامیدلی شي.
چین ته د ملي امنیت شورا سلاکار حمدالله محب سفر ته ځکه خوشبیني شته چې چین پر پاکستان اغیز لري او کولای شي د سولې پروسه کې له دې نفوذ څخه ګټه واخلي.
د سیمې او ګاونډیو هیوادنو ته د افغان حکومت د چارواکو سفرونه کولای شي، له افغانستان سره د نورو هېوادونو اړیکې لا پراخه او پياوړې کړي چې د سولې پروسه کې به ترې ګټه واخلي.
د افغانستان د ملي امنیت شورا سلاکار له هندوستان هیواد ورسته چین هیواد ته دوه ورځینی سفر درلوده او هلته یې له خپل سیال او نورو چینایي چارواکو سره د افغانستان او چین ترمنځ پر امنیتي همکاریو، د افغانانو په مشرۍ د سولې پر روان بهیر او د دواړو هېوادونو ترمنځ په ستراتېژیکو اړیکو خبرې او بحث کړی.
افغانستان کې د دې سفر په تړاو خوشبیني شته چې د اړیکو د پراختیا تر څنګ به د سولې پروسه کې مرسته او همکاري وکړي.
دا سفرونه په داسې حال کې پيل شوي چې له یوې خوا د افغانستان د سولې پروسې لپاره د امریکا ځانګړی استازی په سفرونو بوخت دی او تر دې وړاندې د پاکستان د بهرنیو چارو وزیر او لومړی وزیر ځینې سفرونه درلودل چې ښکاره موخه یې د افغانستان د سولې پروسه یاده شوې.
اوسني وضعیت کې د سولې خبرې تر پخوا په لومړیتوب بدلې شوي، دا ډول سفرونه د افغان حکومت د اړیکو د پراختیا لپاره مهم بلل کیږي.
د ملي امنیت شورا سلاکار د هند په سفر کې د همکاریو او اړیکو د پراختیا ژمنې ترلاسه کړي او دغه راز څلور جنګي الوتکې مرسته یې هم ترلاسه کړې ده.
دغه راز د چین په سفر کې هغه هېواد ژمنه کړې چې د سولې پروسې تر څنګ به له ترهګرۍ سره مبارزه کې له افغان حکومت سره مرسته کوي.
