د ټولګټو وزارت وايي، د افغانستان او ترکمنستان د چارواکو ترمنځ لیدنه کې دواړو لورو د افغانستان رېل پټلیو غځولو پروژې د پرمختګونو ارزونې ترڅنګ، د افغانستان په بندرونو کې د یو شمېر نویو تأسیساتو پر جوړولو هم خبرې کړې. په دغو پټلیو کې د اقینې – اندخوی ترمنځ د لس کیلو مټره رېل کرښې جوړول هم شامل دي.
د ټولګټو وزارت له خوا خپره شو خبرپاڼه کې ویل شوي چې دواړو لورو د تورغونډۍ بندر د پراختیا او د نویو تاسیساتو د جوړولو په اړه هم تفصیلي خبرې کړې دي.
په اعلامیه کې دا هم ویل شوي چې د ټولګټو وزیر ملا محمد عیسی ثاني او په کابل کې د ترکمنستان سفیر خواجه اوویزوف د پروژو په عملي کولو کې د چټکتیا او د دواړو هېوادونو د ټرانسپورټي تواصل د پیاوړتیا په اړه هم نظرونه تبادله کړي.
د ټولګټو وزارت د اعلامیې یوه برخه کې راغلي: « په غونډه کې د رېل پټلیو پروژې د پرمختګ ارزونه وشوه چې په کې د اقینې بندر او اندخوی ترمنځ د لس کیلو مټره اوږدې پټلۍ جوړول هم شامل دي. همداراز د تورغونډۍ بندر د پراختیا او د نویو تاسیساتو جوړولو په تړاو هم تفصیلي خبرې وشوې. دواړو خواوو همدارنګه د پروژو د چټک عملي کولو او د دواړو هېوادونو ترمنځ د ټرانسپورټي نښلون د پیاوړي کولو پر لارو چارو هم خبرې وکړې.»
د افغانستان او ترکمنستان ترمنځ اوس مهال د رېل ګاډي دوې فعالې پټلۍ شته چې دواړه یې د پراختیا په حال کې دي.
د دواړو هېوادونو ترمنځ د رېل ګاډي لومړنۍ پټلۍ د تورغونډۍ بندر له هرات ښار سره نښلوي او دویمه پټلۍ بیا په فاریاب کې د اقینې بندر له ترکمنستان سره نښلوي.
ترکمنستان د دغو دواړو پټلیو په پراختیا کې پانګونه کوي چې په کې له تورغونډۍ څخه تر هرات ښار پورې او همدارنګه د اقینې له بندر څخه تر اندخوی پورې د پټلیو او د ځینو نویو تاسیساتو جوړول هم شامل دي.
د ټولګټو وزارت په اعلامیه کې دا هم ویل شوي چې په غونډه کې دواړو لورو د زېربنايي پروژو او نورو برخو کې د ګډې همکارۍ د لا پراخولو په تړاو هم خبرې کړې دي.
د اعلامیې یوه برخه کې راغلي: « دواړو لورو یوځل بیا د اقتصادي او سوداګریزو اړیکو د پراختیا او د ټرانسپورټ او زېربناوو په برخه کې د ګډې همکارۍ د لا پیاوړتیا لپاره پر خپلو ژمنو ټینګار کړی.»
د افغانستان او ترکمنستان ترمنځ د رېل پټلیو پراختیا په تړاو دا خبرې داسې مهال کېږي چې همدا پټلۍ افغانستان د ترکمنستان له لارې ترکیې سره هم نښلوي.
ترکمنستان د افغانستان او چین ترمنځ د نوي دهلېز رامنځته کولو لپاره د روان کال په مې میاشت کې له شوي تړون هم ملاتړ کوي.
له ترکمنستان سربېره، اوزبېکستان د منځنۍ اسیا دویم هېواد دی چې له افغانستان سره د رېل ګاډي پټلۍ په وسیله نښلول شوی.
د شنونکو په باور، له یادو هېوادونو سره د رېل ګاډي پټلیو پراختیا افغانستان ته دا موقع ورکوي چې خپله سوداګري د سیمې هغو هېوادونو ته هم پراخه کړي چې مستقیمه پوله ورسره نه لري.
