د کندهار په خاکرېز ولسوالۍ کۍ څاه ته لوېدلې ښځې ساه ورکړه

د کندهار ولایت په خاکرېز ولسوالۍ کې وړمه شپه شااوخوا ۶۰ متره ژورې څاه ته لوېدلې ښځې ساه ورکړه. 

د یاد ولایت د اطلاعات او کولتور ریاست مرستيال ملا شمس الله صميمي وایي،دغه مېرمنه  وړمه شپه نهه بجې  له کوره وتلې وه او دا یې څووم ځل وو،چي د کورنیو ستونزو او جنجالونو له امله یې د ځان وژنې هڅه کړې وه.

صمیم وايي، برمې څاه ته د لوېدلي ښځې د ژغورولو ډېره هڅه وشوه، خو پر وینا یې، بیا هم ونه توانېدل، چې ژوندۍ یې را وباسي.

نوموړي زیاتوي،چې امنیتي ځواکونو د هغې خاوند نیولی او پېښه تر څېړنو لاندې ده.

دا لومړی ځل نه دی،بلکې له دې  وړاندې په هلمند، کندهار او زابل ولایتونو کې د ماشومانو په ګډون یو شمېر کسان څاه ګانو ته لویدلي او مړه شوي دي.