وردګ: غواړم خپلو هېوادوالو ته چوپړ وکړم 

له بهر میشتو پخوانیو سیاسیونو سره د اسلامي امارت د تماس کمېسیون په هلو ځلو په پایله کې د چهارشنبې پر ورځ د « ۱۴۰۱ کال د غبرګولې پر ۱۸ مه» پارلماني چارو کې د دولت  مخکېنی وزیر فاروق وردګ هم هېواد ته راستون شو

ډاکټر فارق وردګ له شمشاد سره په ځانګړو خبرو کې وویل،د جمهوریت له سقوط وړاندې د درملنې لپاره ترکیې هېواد تللی و،خو اوس اسلامي امارت سره د اړیکو وروسته هېواد ته راستون شوی دی. 

وردګ وايي،د مدیریتي تجربې ترڅنګ ملي او نړیواله پیژندګلوي هم لري او راغلی،چې په دغو برخو کې خپلو هېوادوالو ته خدمت وکړي. 

هغه زیاته کړه:«دغه څه چې زه لرم،که مدیریتي تجربه ده او که ملي او بین المللي شناخت  دی، له دې لارې خلکو ته د خدمت لپاره وقف کوم. دا خدمت به په هېواد کې د ثبات سوکالۍ او د خلکو پر هوساینې منتج کیږي.» 

وردګ په ټولو هغو کسانو،چې اوس له هېواده بهر اوسیږي،خو د مقاومت او جګړې خبرې کوي غږ وکړ،چې نور دې   د جګړې نغاره نه غږوي او را دې شي، د خپل هېواد دابادۍ لپاره دې کار وکړي. 

وردګ له اسلامي امارته وغوښتل،چې نور دې هم خپله غږ پراخه کړي او انزوا او تجرید ته د بیولو سیاست ترخه تجربه دې نه تکراروي. 

وردګ زیاتوي:« جنګ دوه هدفه څاري،د افغان وژنه او د افغان وطن ړنګونه او نتجه یې هم پیښماني د. هغه پخواني سیاسیون،چې بهر دي نور دې،د جنګ ډنډورې نه غږوي او هېواد ته دې راشي او اسلامي امارت دې هم خپله سینه نوره هم پراخه کړي. پر اسلامي امارت مې غږ دادی،چې د تجرید انزوا ته د بیولو نسخو کار نه دی ورکړی،د بن د قرارد ستر ضعف همدا و،چې طالبان او حزب اسلامي له قدرت بهر پاتې شول او نتجه یې هم دا وه،باید دا تجربې نورې تکرار نه شي.» 

د تیرنظام دغه چارواکی وايي،نړۍ له افغانستان سره له تعامل پرته بله لاره  نه لري او ډاډه دی،چې افغانستان نړیوال مشروعیت ترلاسه کوي،خو د دغه هدف لپاره باید لومړی اسلامي امارت ځینې ګامونه واخلي. 

وردګ زیاته کړه:«زه فکر کوم اول قدم باید اسلامي امارت واخلي،څه چې یې د افغانستان ته د خدمت  د رهبرۍ د ساتنې او د افغانانو د خوښۍ لپاره په زړه کې دي،د کاغد پرمخ دې د لارې دنقشې په شکل دې ولیکي  او نړۍ ته دې وړاندې کړي او یقین لرم،چې نړۍ به له  موږ سره تعامل کوي.» 

له بهرمیشتو افغان شخصیتونو سره د اسلامي امارت د تماس کمېسیون د هلو ځلو په پایله کې تر اوسه ګڼ شمیر پخواني چارواکي هېواد ته راستانه شوي،چې ملي دفاع وزارت پخوانی ویاند جنرال دولت وزیري،د برښنا شرکت پخوانی رییس امان الله غالب،دټرانسپورټ وزارت پخوانی وزیر حسن مبارک عزیز،د پخواني ولسمشر د دفتر مشر سلام رحیمي هغه کسان دي، چې تازه هېواد ته راستانه شوي دي.