پکتیا کې د وچکالۍ له امله د اوبو کچه تر ۸۰ سلنې ښکته شوې 

په سوېل کې د پکتیا ولایت د چاپېریال ساتنې ریاست مرکز ګردیز کې د چاپیریال ساتنې نړیوالې ورځې نمانځنې په موخه د پاکوالي حشر ترسره کړه.

د یاد ولایت د والي مرستیال  عزیزالرحمن منصور وایي،چاپیریال ساتنه د اسلام مبارک دین کې ځانګړی ځای لري او پر مسلمانانو لازمه ده،چې د خپل چاپیریال پاکوالي ته پام وکړي. 

منصور زیاته کړه:« څوک چې له لوګي،ګرد او له  بد بویۍ ځان وساتي. د هغه کس عمر به سل کاله وي، نو دا حدیث مبارک موږ ته د چاپیریال ساتنې ارزښت را په ګوته کوي،چې پاملرنه ورته څومره ضروري ده.» 

د یاد ولایت د چاپیریال ساتنې ریاست مشر عبدالهادي هدایت بیا وايي، د وچکالۍ او ورښتونو نه موجودیت له امله دغه ولایت کې د اوبو کچه تر۸۰ سلنې ټیټه شوې او پر وینا یې خلک باید د اوبو له استعمال سره احتیاط وکړي. 

هدایت زیاته کړه:« د بارانونو کچه هم ټیټه ده، بارانونه هم نه دي شوي، په ځمکه کې د اوبو سطحه له ۷۰ تر  ۸۰ سلنې ټیټه شوې. نو د دې د مخنیوي لپاره  اړینه ده،چې خلک د اوبو له استعمال سره احتیاط وکړي.» 

هدایت وایي، له کرنې ریاست سره پر همغږۍ د ځنګلونو د بیارغولو بېلابېل پروګرامونه په پام کې لري او د ځنګلونو د ساتنې په موخه به نږدې راتلونکي کې سل کسیزه قطعه جوړه شي.

هغه زیاته کړه:«د دې لپاره به زرغونه قطعه جوړیږي،ټول امکانات ورته برابر شوي دي. دوی به وخت پر وخت زموږ د مالوماتو له مخې، به پر ځنګلونو ګرځي او څوک چې ځنګلونه تخریب کوي،هغوی ته به سزا ورکوي.» 

د چاپیریال ساتنې ریاست وایي،له امنیتي ارګانونو سره په ګډه پکتیا کې په بشپړ ډول د ځنګلونو له غوڅولو مخنیوی شوی او په دې وروستیو کې شپږ کسان د ځنګلونو د غوڅونې په تور نیول شوي دي.