د نورستان والي د ځینو پاکستاني رسنیو هغه ادعا رده کړه چې وايي پاکستاني پوځیانو د نورستان په برګمټال او کامدېش ولسوالیو کې له فرضي کرښې دې غاړې ته نوره خاوره هم نیولې او ټینګار یې کړی چې د افغانستان د اسلامي امارت ځواکونه د نورستان پر ټولو سیمو بشپړ کنټرول لري.
قاري زین العابدین عابد دغه راز وايي، اسلامي امارت د جدي دریځ په غوره کولو سره د هېواد له ځمکنۍ بشپړتیا دفاع ته پوره چمتو دی او د هېواد یوه لوېشت خاوره هم د هېچا له لوري نه ده نیول شوې او نه به چاته د دې کار اجازه ورکړل شي.
عابد زیاتوي: « دا چې پاکستاني رسنیو تبلیغات کول چې کامدېش مو تقریبا ً نیولی، دا هسې دروغ دي. زه خپله کامدېش ته لاړم او خلکو به د میډیا له لارې لیدلی هم یم. زه ډاډ ورکوم چې یوه لوېشت خو څه چې یوه سانتي ځمکه یې هم له موږ څخه نه ده نیولې او نه هم اجازه ورکوو. زموږ ولسونه له موږ سره دومره ټینګ ولاړ دي چې موږ ته راغلل او د اجازې غوښتنه یې وکړه او ویې ویل چې موږ به خپله چترال هم له پاکستان ونیسو.»
نورستان والي دغه راز وایي، پاکستان د امریکا جګړه مخته وړي؛ ځکه په خبره یې، اسلامي امارت د بګرام اډې په اړه د امریکا غوښتنه رد کړې او پاکستان اوس غواړي له یادې پروژې سره امتیازات ترلاسه او افغانستان نا امن کړي، خو خپلو موخو ته به ونه رسېږي. د زین العابدین عابد په خبره، پاکستان هېڅکله په افغانستان کې يو با امن حکومت او نظام نه غواړي.
د نورستان والي په دې اړه وايي: « زما د معلوماتو له مخې، پاکستان له امریکا پروژه اخستې چې افغانستان نا امن کړي. دا ځکه چې امریکا له موږ د باګرام اډه وغوښته، خو موږ ورنه کړه. بیا پاکستانیان ورغلل او امریکا ته یې وویل چې افغانستان کې پاتې امریکايي وسلې به ورته ختمې کړي. د امریکا ولسمشر لاشعور دی او د پاکستان په خبرو تېروتی. دوی د افغانستان د نا امنه کولو پروژه پاکستان ته ورکړې ده؛ ځکه د افغانستان په بد امنۍ کې د دوی ګټې دي.»
عابد دا هم وايي چې پاکستان ته په افغانستان کې داسې يو حکومت د منلو نه دی چې پر پخپلو پښو ولاړ وي. نوموړی په افغانستان کې د اسلامي نظام ساتنه فرض ګڼي او همداراز له ولسونو څخه غواړي چې د نظام ترڅنګ ودرېږي او د پرديو د پوچو تبليغاتو ښکار نه شي.
نورستان والي زیاتوي، په دې ولایت کې هېڅ سیاسي پېښه نه ده ثبت شوې او نه هم کومه وسله واله ډله فعالیت لري او نه به هم چاته اجازه ورکړل شي.
زینالعابدین عابد وايي: « پاکستان هېڅکله نه غواړي افغانستان کې امن او قوي حکومت راشي؛ که دا اسلامي وي یا غیر اسلامي حکومت. زه په ټولو افغانانو غږ کوم چې د دې نظام ملاتړ وکړي؛ موږ له پاکستان سره په جګړه اخته یو او که څوک افغاني او اسلامي غیرت لري، نو زموږ د نظام ملاتړ دې وکړي.»
له دې وړاندې د اسلامي امارت یوه بل جګ پوړي چارواکي ملا عبداللطیف منصور هم له شمشاد سره ځانګړې مرکه کې ویلي وو چې پاکستان په افغانستان کې یو پیاوړی او په پښو ولاړ مرکزي حکومت نه شي زغملی.
د نوموړي په خبره، پاکستان د افغانستان استقلال او ځواکمنتیا نه خوښوي او هڅه کوي چې په افغانستان کې یو خپلواک او ځواکمن حکومت رامنځته نه شي.
