پکتیا: مرکز ګردیز او یو شمېر ولسوالیو کې د مطالعې دود عام کولو په موخه د کتابونو نندارتونونه جوړ شوي 

په سویل کې د پکتیا ولایت اطلاعاتو کولتور ریاست  مشر خلقیار احمدزی وايي، په مرکز ګردیز،زرمت،سیدکرم او څمکنیو ولسوالیو کې یې د مطالعې دود عام کولو لپاره د کتابونونو نندارتونونه جوړ کړي دي

احمدزی وایي، د کتابونو له دا ډول نندارتونونو یې موخه یې  د ځوانانو او د ښوونځیو د زده کوونکو تر منځ د مطالعې انګیزې پیدا کول او یو شمېر کتابونو ته د ځوانانو لاسرسی دي.

هغه زیاته کړه:« د کتابونو له دا ډول نندارتونو مو موخه ځوانانو کې د مطالعې دود عامول دي څو خلک کتاب لوستلو ته را وبولو ، د کتاب په ارزښت یې وپوهوو د همدې لپاره دا څلورم لوی نندارتون دی د پکتیا په کچه.» 

د یو شمیر ښوونځیو زده کوونکي وایي، کورنۍ یې بې وزلې دي،د خوښې وړ کتابونو د رانیولو توان نه لري او د کتابتونونو مسوولین باید ځېنې کتابونه د مطالعې لپاره ورکړي.

په پکتیا کې د ښوونځي یو تن  زده کوونکی وايي:« زموږ لپاره دا ډول نندارتونونه ډېر ګټور دي،ځکه، د ښوونځیو زده کوونکي د ښوونځیو د کتابونو تر څنګ ازاده مطالعه باید وکړي.»

په پکتیا کې د ښوونځي یو بل  زده کوونکی بیا وايي:« موږ د هرې ژبې کتاب لولو، ځکه د نیکمرغۍ  لامل ګرځي.خلک ډېر غریب دي. د ټولو کتابونو د رانیولو وس نه لري او باید ځېنې کتابونه د مطالعې لپاره راکړل شي.» 

د پکتیا اوسېدونکی عزیز انیس د کتابونو نندارتونونو جوړول خورا ګټور بولي او وایي،په دې سره د ځوانانو تر منځ کې د مطالعې او د کتاب لوستلو سیالۍ رامنځته کیږي.

انیس زیاتوي:« د کتاب له ارزښته موږ منکر کیدلی نه شو. نورې نړۍ چې څومره پرمختګونه کړي، دا ټول د کتاب له برکته دي. که نن دوی ټکنالوژي لري ، که علمیت او وسایل لري،دا ټول د کتاب له درکه دي.» 

یو شمیر کتاب پلورونکي د وروستیو سیاسي تحولاتو له کبله له خپل روزګاره راضي نه دي او وایي، د بې وزلۍ له کبله ډېری ځوانان په نیمه بیه کتابونه پر دوی بېرته پلوري.