د افغانستان اهل تشیع عالي کمیسیون د هېواد په اکثریت ولایتونو کې د عاشورا مراسمو د امنیت ټینګولو لپاره د اسلامي امارت د هڅو ستاینه وکړه.
د دې کمیسیون له لوري په جوړ شوي کنفرانس کې ګډونوالو په هېواد کې د موجوده امنیت، ملي یووالي په اړه خبرې وکړې او په دې برخه کې یې د اسلامي امارت د هلوځلو یادونه وکړه.
دوی زیاته کړې، د افغانستان بېلابېل قومونه او مذهبي ټولنې نن د متقابل درناوي او ورورولۍ په فضا کې ژوند کوي او حکومت هڅه کوي چې دا ملي یووالی لا پیاوړی کړي.
د افغانستان د اهل تشیع ټولنې رییس سید حسن فاضل زاده زیاته کړې چې امنیت د یوې ټولنې د بقا، ثبات او پرمختګ اساسي بنسټ دی.
ده همداراز ټینګار کړی چې د امنیت په سیوري کې خلک کولی شي خپل دیني مراسم، ټولنیز فعالیتونه او اقتصادي چارې په ډاډمنه فضا کې ترسره کړي.
فاضل زاده دغه راز ویلي: « له اسلامي انظام څخه د اطاعت موضوع ته له دوو اړخونو کتنه کولی شو، یانې عقلي او شرعي دلایل. ټول علما او د دیې پيرو دي او په شرعي دلایلو کې هم د قرآنکریم امر دی چې د النساء سورت په ۵۹ آیت کې شوی.»
په دې کنفرانس کې د سرحدونو، قومونو او قبایلو چارو وزیر، مولوي نورالله نوري هم ګډون کړی و. نوموړي په خپلو خبرو کې په هېواد کې د امنیت ټینګښت د هر حکومت اساسي او نه بېلېدونکې دنده بللې او ټینګار يي کړی چې اسلامي امارت توانېدلی د نورو نظامونو او حکومتونو په پرتله د امنیت د تامین او د خلکو ترمنځ د یووالي په رامنځته کولو کې د پام وړ پرمختګ وکړي.
مولوي نورالله نوري زیاته کړې: « دا چې نن ورځ زموږ خلک د اسلامي نظام تر سیوري لاندې په ازادۍ، امنیت، ملي یوالي، خوندي توب او واحدې جغرافیې کې ژوند کوي، دا د اسلامي نظام نتیجه ده.»
د سرحدونو، قومونو او قبایلو چارو وزیر له هېواد څخه بهر د ځینو مخالفو کړیو هغو څرګندونو ته هم اشاره وکړه چې د نظام پر ضد د عامو خلکو را پارولو هڅې کوي. نوموړي ویلي چې افغانان اوس د تبلیغاتو او بې بنسټه ادعاوو تر اغېز لاندې نه راځي.
نورالله نوري په دې اړه ویلي: « موږ په ځینو جلسو کې یادونه کوو چې د اسلامي امارت د مخالفینو موضوع چې له افغانستان څخه د باندې په ترکیه، پاکستان او نورو ځایونو کې خبرې کوي او وايي چې موږ افغانستان ازادوو، دوی ته زموږ وړاندیز او سپارښتنه دا ده چې که دوی ادعا کوي چې د روسانو پر وړاندې یې د افغانستان د ازادۍ لپاره جګړه کړې، نو زه ورته وایم چې نن افغانستان ازاد دی.»
د اهل تشیع عالی کمېسیون په هېواد کې د امنیت او ملي یووالي د ټنیګښت په اړه د اسلامي امارت هڅو ستایلو ترڅنګ، له دغو ارزښتونو څخه دفاع د هر افغان مسوولیت وباله.
دوی همداراز له خلکو وغوښتل چې د سولې، ورورولۍ او ګډ ژوند د پیاوړتیا لپاره همکاري وکړي.
