د کانونو او صنایعو خونه وايي، کابل کې د صنعت او معدن اوونۍ اووه ورځینی پنځم نړیوال نندارتون جوړیږي چې بېلا بېل کورني تولیدات به پکې نندارې ته وړاندې شي.
مسولان وايي، د کورنیو صنعتي تولیداتو په دې اووه ورځیني نندارتون کې به په ۳۶۵ غرفو کې بېلابېل کورني تولیدات نندارې ته وړاندې شي.
د دوی په خبره، هڅه شوې چې په افغانستان کې ټول فعال تولیدي شرکتونه خپل تولیدات دیاد نندارتون له لارې خلکو ته معرفي کړي.
د کانونو او صنایعو خونې د عامل پلاوي رییس محمد اسماعیل خان وايي: « دا نندارتون به اووه ورځې ادامه ولري؛ دا به د چنګاښ په ۱۰ نېټه پیل او په ۱۶ نېټه پای ته ورسېږي. د نندارتون په مرکز کې درې لوی سالونونه چې یو یې د کابل ويآیپي سالون، آریانا سالون او کندهار سالون دي، درې واړه ډک شوي او ټولې ۳۶۵ غرفي نیول شوې دي.»
د اوسپنې وېلې کولو ټولنې رییس عبدالنصیر رښتیا وايي: « په دې لوی نندارتون کې به شاوخوا ۴۰۰ شرکتونه ګډون ولري. موږ تمه لرو چې په دې نندارتون کې د محصلینو او زده کوونکو په ګډون د ټولنې ټول اقشار برخه واخلي او د افغانستان له تولیداتو لیدنه وکړي.»
صنعتکاران له خلکو غواړي یاد نندارتون ته چې ټاکل شوې راتلونکې شنبه پیل شي، راشي او د هېواد له کورنیو تولیداتو ملاتړ وکړي.
صنعتکاران ولس ته ډاډ ورکوي چې هڅه کوي په هره برخه کې لوړ کیفیت توکي تولید او د خلکو په واک کې ورکړي.
د کانونو او صنایعو خونې مرستیال محمد رفیع عظیمي وايي: « خلکو ته بلنه ورکوو چې له دې نندارتونه لیدنه وکړي او د خپل هېواد له صنعت څخه ملاتړ وکړي. د کورنیو تولیداتو انتخاب او کارول د ملي صنایعو د تقویت، کاري فرصتونو پيدا کېدو او د یوه ځان بسیا او صنعتي افغانستان په لوري د حرکت سبب کېږي.»
د کانونو او صنایعو خونې د مدیره پلاوي غړی محمد سید صدیق وايي: « دلته زموږ صنعتکاران هڅه کوي هغه څه ولس ته وړاندې کړي چې دوی یې په خپلو فابریکو کې تولیدوي.»
د صنعتکارانو په باور، د یاد نندارتون د جوړېدو موخه یوازې نندارې ته د کورنیو تولیداتو وړاندې کول نه دي بلکې له دې سره به کورنیو او بهرنیو پانګوالو ته د پانګونې فرصتونه په ډاګه شي او د هېواد اقتصادي وده کې به ورسره مرسته وکړي.
د کانونو او صنایعو خونې مرستیال محمد خان وايي: « د دې نندارتون ارزښت یوازې د تولیداتو تر نندارې پورې محدود نه دی بلکې د افغانستان د اقتصادي ودې او صنعتي راتلونکي لپاره یو مهم فرصت دی. د صنعت اوونۍ نندارتون به کورنیو او بهرنیو پانګوالو ته دا زمینه برابره کړي چې په بېلابېلو سکټورونو کې شته ظرفیتونه له نږدې وویني، نوې نظریې ترلاسه کړي او د پانګونې لپاره مناسب فرصتونه وپېژني.»
د صنعت او کانونو اوونۍ د پنځم نړیوال نندارتون جوړونکي دغه راز وايي چې د سیمې هېوادونو استازو او کورډېپلوماټیکو ته ېې هم په دې نندارتون کې د ګډون بلنه ورکړې، ترڅوله دې سره د افغانستان کورني تولیدات بهرنیانو ته هم معرفي شي.
