بهرنیو چارو وزارت وايي، په پکتیا، پکتیکا او کونړ ولایتونو کې پر ملکي کورونو د پاکستان پوځي رژیم د نیمې شپې هوايي بریدونو په غبرګون کې یې په کابل کې د پاکستان شارژدافیر احضار او د اسلامي امارت احتجاج لیک ورسپارلی دی.
له بهرنيو چارو وزارت په خپره شوې خبرپاڼه کې راغلي، د پاکستان پوځي رژيم د وړمې شپې په بريدونو کې د ښځو او ماشومانو په ګډون ۳۶ ملکي وګړي شهيدان او ۱۶۳ نور ټپيان شوي دي.
د اسلامي امارت بهرنيو چارو وزارت دا بريدونه د نړيوالو اصولو، بشري قوانينو او د افغانستان ملي حاکميت ښکاره نقض بللی او په کلکو ټکو يې غندلي دي.
بهرنیو چارو وزارت ټينګار کړی چې دا ډول کړنې نه يوازې د شته ستونزو د حل لاره نه ده، بلکې د دواړو هېوادونو ترمنځ د باور فضا، د ګاونډيتوب اړيکې او د سيمې امنيت او ثبات ته هم جدي زيان رسوي.
د بهرنیو چارو وزارت مرستیال حافظ ضیا احمد تکل په دې اړه وايي: « د افغانستان اسلامي امارت د بهرنیو چارو وزارت په کابل کې د پاکستان سفارت شارژدافیر احضار کړ او د افغانستان د هوايي حریم د نقض او په کونړ، پکتیا او پکتیکا ولایتونو کې یې د ملکي وګړو پر کورونو د بمبارۍ په تړاو خپل شديد او قاطع اعتراض ورته وړاندي کړ. تېره شپه د پاکستان متجاوز پوځي رژیم د افغانستان د کونړ، پکتیا او پکتیکا ولایتونو په ځینو سیمو کې د ملکي وګړو پر استوګنیزو کورونو هوايي بریدونه وکړل چې له امله یې د ښځو او ماشومانو په ګډون ٣٦ تنه عام ولسي وګړي شهیدان او ١٦٣ تنه ټپیان شوي دي. د افغانستان اسلامي امارت دغه بریدونه د نړیوالو اصولو، بشري قوانینو او د هېوادونو د ملي حاکمیت ښکاره نقض بولي او په کلکو ټکو یې غندي.»
د بهرنیو چارو وزارت په خبرپاڼه کې دغه راز راغلي چې دا لومړی ځل نه دی چې د پاکستان پوځي رژیم د افغانستان له کرښې څخه په سلګونو کیلومټره لرې د پاکستان په ځینو ښارونو او ډېرو خوندي سیمو کې رامنځته شويو امنیتي پېښو، چاودنو او بریدونو پلان بېله کوم معتبر سند او شواهدو افغانستان ته منسوبوي بلکې له تېرو څو کلونو راهیسې یې د خپلو امنیتي او سیاسي ناکامیو د پټولو په موخه پر افغانستان د بېبنسټه تورونو لګولو او د ستونزو د انتقال هڅه کړې او په مکرر ډول یې د زور او نظامي تېري له لارې د دغو ستونزو د حل ناکامه تګلاره خپله کړې.
