د افغانستان د سولې پروسه کې د هند رول باندې ټینګار کیږي.
خلیلزاد په هند کې له هندي چارواکو سره د افغانستان په تلپاتې سولې خبرې کړي دي.
هند پر طالبانو د پاکستان له نفوذ اندیښنه لري، خو هند ته ډاډ ورکړل شوی چې که طالبان د افغان حکومت برخه وګرځي، د هند لپاره د انديښنې وړ نه دي.
خلیلزاد چې په څلورم سفر د جنوري په اتمه نېټه راوتلی له هند یې پيل کړ او ټاکل شوې چې چین، پاکستان او افغانستان ته هم په سفر لاړ شي.
په هند کې د خلیلزاد خبرې ګټورې یادې شوي چې د افغانستان په تلپاتې سولې باندې بحث شوی دی.
زلمي خلیلزاد د هند د سفر په تړاو په خپل ټویټر داسې لیکلي ((زموږ هېوادونه له افغانستان سره اوږد مهاله ژمنې لري، موږ په دې اړه چې په افغانسان کې څنګه یو تلپاتې سوله ټینګېدای شي خبرې وکړې او د دوه اړخیزو او سیمه ییزو ممکنه همکاریو باندې مو هم خبرې وکړې.))
له دې سره د هند د بهرنیو چارو وزارت ډاډ ښودلی چې هند په افغانستان کې سوله غواړي او په دې برخه کې له همکاریو مخ نه اړوي.
هندي چارواکو خلیلزاد ته د افغان سولې برخه کې له خپلو همکاریو ډاډ ورکړی او پر دې یې خبرې کړي چې امریکا په افغانستان کې د سولې برخه کې څه ډول هڅې پیل کړي دي..
د هند د بهرنیو چارو وزارت ویاند رویش کومار داسې ویلي ((هند له خلیلزاد سره خبرو کې روښانه کړه چې افغانستان کې د سولې او پخلاینې پروسه باید د افغانانو په مالکیت او کنټرول کې وي، د افغانستان په اړه زموږ دریځ مالوم او ثابت دی، چې هند د افغانستان د سولې او پخلاینې له پروسې ملاتړ کوي.))
خلیلزاد داسې مهال له هندي چارواکو سره د افغان سولې په تړاو خبرې کړي چې د راپورونو له مخې، د هند د پوځ لوی درستیز هم لېوالتیا ښودلې چې هند باید د افغانستان د سولې په روانو هڅو کې شامل شي.
