د پاکستان پوځي رژیم یوځل بیا په پکتیا، پکتیکا او کونړ ولایتونو هوایي بریدونه کړي چې د دوی د ادعاوو برعکس یې قربانیان د ښځو او ماشومانو په ګډون، ټول عام افغانان دي.
دغه هوایي بریدونه د شپې مهال شاوخوا ۱۲ بجې ترسره شوي چې د اسلامي امارت د مرستیال ویاند له قوله په کې ۲۸ تنه شهیدان او ۱۶۳ نور ټپیان شوي دي.
دا شمېرې چې تر اوسه لا وروستي شوي نه دي، په کور دننه او بهر له پراخو غبرګونونو سره مخ دي.
د افغانستان پخواني ولسمشر حامد کرزي د پاکستان بریدونه په کلکو ټکو غندلي او دا یې د افغانستان له ملي حاکمیت ښکاره سرغړونه بللې.
کرزي پر خپله اېکس پاڼه لیکلي: « د پاکستان د هوايي ځواکونو له خوا د پکتیا، پکتیکا او کونړ ولایتونو پر استوګنیزو سیمو برید د افغانستان د ملي حاکمیت ښکاره سرغړونه او د نړیوالو اصولو او قوانینو خلاف عمل دی او په سختو ټکو یې غندم. برید شهیدانو ته د فردوس جنت، ټپیانو ته د ژر روغتیا دعا کوم او له زیانمنو کورنیو سره خپله خواخوږي څرګندوم. د پاکستان خیر په دې کې دی چې له دښمنې پالیسۍ او د افراطیت په اړه له دوهګوني چلن لاس واخلي او له افغانستان سره د ښه ګاونډیتوب او متمدانه اړیکو پر بنسټ متقابل تعامل او همکاري وکړي.»
د پاکستاني وحشت د غندنو په دوام، په تېر حکومت کې د ملي روغې جوړې عالي شورا مشر هم دا بریدونه غندلي او زیاته کړې یې ده چې دا ډول اقدامات نه یوازې ستونزې نه شي هوارولی بلکې د تاوتریخوالي او کړکېچ زیاتېدو لامل هم ګرځي.
ډاکټر عبدالله عبدالله ویلي: « پر پکتیا، پکتیکا او کونړ ولایتونو د پاکستان بریدونه چې له امله یې زموږ ګڼ شمېر بېګناه هېوادوال شهیدان او ټپیان شوي، په سختو ټکو غندم. دا ډول خصمانه اقدامات نه یوازې دا چې هېڅ ستونزه نه حلوي بلکې د تاوتریخوالي او کړکېچ د لا زیاتېدو لامل ګرځي. تجربو ښودلې چې زور او پوځي اقدامات هېڅکله د اختلافاتو د هواري لپاره تلپاتې او اغېزمنه حللاره نه وه او نه به وي بلکې له دې وضعیت څخه د وتلو یوازینۍ لار د ښه ګاونډیتوب اصولو ته ژمنتیا، رغنده خبرې اترې او د اختلافاتو سولهییز او ډېپلوماټیک حل دی.»
په تېر حکومت کې د مشرانو جرګې رییس فضل الهادي مسلمیار هم په دې بریدونو خواشیني څرګنده کړې او له نړیوالې ټولنې او ملګرو ملتونو یې غوښتي چې په دې بریدونو نوره خاموشي اختیار نه کړي.
فضل الهادي مسلمیار ویلي: « نړیواله ټولنه او د ملګرو ملتونو امنیت شورا دې په رسنیو کې د دغو بریدونو د قربانیانو انځورونه وویني چې ایا دوی ماشومان، مېرمنې او سپین ږیري په نښه کړي که بل څوک؟ دومره ستر وحشت او دومره لویه فاجعه باندې نړیواله ټولنه او ملګري ملتونه څنګه خاموشه دي؟ د پاکستان پوځي رژیم پرله پسې خپلسرې بمباري کوي، نړیوال جنګي او نظامي قوانین تر پښو لاندې کوي، ماشومان او مېرمنې په نښه کوي چې دا د ټولو نړیوالو اصولو او قوانینو خلاف ورزي ده او باید ملګري ملتونه یې په اړه جدي ګامونه واخلي او د خپلسرو بمباریو پوښتنه ترې وکړي.»
بله خوا، د اسلامي امارت ویاند ذبیح الله مجاهد شمشاد ته منلې چې په دې بریدونو کې د ملکي تلفاتو کچه لوړه ده، خو وایي د پاکستان دا جنایت به بې ځوابه نه پاتې کېږي.
ذبیح الله مجاهد زیاته کړې: « د افغانستان اسلامي امارت دا یو تېری او وحشت بولي او په دې کې شک نه شته چې ښکاره ظلم شوی. دا جنایت به بې پوښتنې نه پاتې کېږي. باید یادونه وکړم چې ملکي تلفات اوښتي او ډېر زیات دي.»
پاکستان په داسې حال کې یوځل بیا د یوه خپلواک افغانستان پر وړاندې هر اړخیز قوانین نقض کړي چې له دې وړاندې یې هم په کابل کې د روږدو درملنې ۲ زره بستریز کمپ(امېد روغتون) په نښه کړ چې شاوخوا ۷۰۰ کسانو ته په کې مرګ ژوبله واوښته.
