متقي: افغانستان د سیمې وصل پر مرکز بدلېدونکی دی

د افغانستان اسلامي بهرنیو چارو سرپرست وزیر مولوي امیر خان متقي د جمعې پر ورځ د «۱۴۰۱ کال د غبرګولې پر ۱۳ مه» د بېلابېلو وزارتونو له ویاندویانو، د رسنیو استازو لیکوالانو او د مدني ټولنې یو شمیر فعالانو سره په ناسته کې د تېرو نهو میاشتو لاسته راوړنې شریکې کړې.

متقي وایي، د اسلامي امارت په راتګ سره په ټول هېواد کې امنیت تامین شوی، افغانستان دا مهال له ټولې نړۍ سره متوازن سیاست لري، لګول شوي بندیزونه کم شوي او ګڼو هېوادونو کې سفارتونه پرانېستل شوي او په خبره یې دا لویه لاسته راوړنه ده.

متقي زیاته کړې:«  موږ په داسې حال کې د بهرنیو چارو وزارت ته راغلو،چې له نیمې نړۍ سره جنګیدلي وو. هغه دوښمن،چې ۲۰ کاله ورسره جنګېدلي وو، هغه اروپا وه، که امریکا وه، له هغوی سره مو په دوامداره ناستې وکړې.  ځینې اقتصادي بندیزونه راکم شول او د نړۍ سفارتونه خلاص شول. په ډېرو هېوادونو کې زموږ استازي ومنل شول. ډېرو پخوانيو ډیپلوماټانو راسره همکاري شروع کړه. الحمد الله په دې برخه کې هم ښه لاسته راوړنه لرو.»

په دغه ناسته کې له نړۍ او ګاونډیو هېوادونو سره پر سوداګریزو او اقتصادي اړیکو ټینګار شوی او ویل شوي، چې د تېر پرتله له افغانستان سره ټرانزیټ او سوداګري زیاته شوې ده.

متقي وايي، د هېواد ټول بندرونه د سوداګرۍ او ټرانزیټ پر مخ پرانیستي دي او افغانستان د نړۍ د اتصال پر مرکز بدلېدونکی دی،چې دا د اسلامي‌امارت د غوره سیاست پایله ده.

 هغه زیاته کړه:« له ټولې نړۍ سره مو یو غوره سیاست پر یووړ. نن موږ له یوه ګاونډي سره هم ستونزه نه لرو. نن مو د شیر خان بندر هم ازاد ده، هیراتان بندر هم ازاد ده، تورغونډۍ او اسلام کلا هم ازاد دي، بولدک او تورخمو مو هم ازاد دي. موږ له ټولو سره ښې اړیکې لرو.  د ټولو لپاره ورو، ورو  د اقتصاد پر مرکز هم بدلېږو. دا زموږ او تاسو د غوره سیاست پایله ده.»

متقي وايي،په تېرو ۴۳ کلونو کې په لومړي ځل ملي بودیجه له داخلي عوایدو برابره شوې او په کمو امکاناتو یې د ګڼو پروژو چارې پيل کړي دي.

متقي زیاته کړې:« په تېرو ۴۳ کالو کې موږ او تاسې د لومړي ځل لپاره خپلواکه بودیجه تصویب کړه. دا بودیجه مو له خپلو عوایده وه. دا هغه لاسته راوړنې دي،چې دوښمنان یې نه شي زغملی.»

امیرخان متقي وایي،د زده کړو په برخه کې کار شوی،له شپږم ټولګي پورته د نجونو ښوونځیو د پرانېستلو په طرحه کار روان دی او ګڼ کانونه په قراردادونو ورکړل شوي، چې زرګونه کسان په کې پر کار بوخت دي.