د شانګهایی همکاریو سازمان وايي، له ملګرو ملتونو سره یې د څلورمې مشورتي غونډې اجنډا د افغانستان او منځنۍ اسیا امن او ثبات او د دواړو ټولنو ترمنځ د همکاریو زیاتولو ته ځانګړې شوې وه.
د شانګهای همکاریو سازمان په یو بیان کې ویلي، دا غونډه د شنبې په ورځ په نیویارک کې د ملګرو ملتونو په مرکزي دفتر کې جوړه شوی وه.
د بیان له مخې، په دې غونډه کې چې د شانګهای همکاریو سازمان د پلاوي مشري د دې سازمان مرستیال احمد سعید مراد زاده کوله، د ملګرو ملتونو پلاوي مشري د منځني ختیځ، اروپا، امریکا او اسیا آرام سمندر چارو لپاره د ملګرو ملتونو مرستیال محمد خالد خیاري په غاړه لرله.
په بیان کې راغلي، دواړو لورو د افغانستان او منځنۍ اسیا د امن او ثبات په تړاو په خپلو کې سلا مشورې کړې دي.
په دې بیان کې زیاته شوې: « د شانګهای همکاریو سازمان(اېسسياو) د دارالانشا او د ملګرو ملتونو د دارالانشا ترمنځ د سلا مشورو په څلورم پړاو کې د افغانستان د ثبات ټینګولو، په منځنۍ اسیا کې د سولې او امنیت د ټینګښت او د دواړو بنسټونو ترمنځ د همکاریو پراختیا په اړه خبرې شوې دي.»
د شانګهای همکاریو سازمان د خبرپاڼې له مخې، دواړو لورو د خپلو ګډو کاري برخو اړوند موضوعاتو په اړه نظرونه هم تبادله کړي.
د شانګهای همکاریو سازمان پلاوي همدارنګه د بېشکېک راتلونکې سرمشریزې لپاره د چمتوالي، د قرغېزستان د مشرۍ پر مهال د وزیرانو غونډو د پایلو، د سازمان د روانو کورنیو اصلاحاتو او د ملګرو ملتونو له تخصصي ادارو سره د همکاریو په اړه هم معلومات وړاندې کړي دي.
په ځواب کې د ملګرو ملتونو پلاوي د «اقلیم، سولې او امنیت» د اجنډا په چوکاټ کې د خپلو فعالیتونو، د افغانستان د ثبات لپاره د ترسره کېدونکو هڅو او د منځنۍ آسیا له هېوادونو سره د دوامدارې سولې او ثبات د پیاوړتیا لپاره د ملاتړ پروګرامونو په اړه معلومات وړاندې کړي دي.
د سیاسي چارو شنونکي چې دا ډول ناستې په ټول جدیت سره تعقیبوي وايي، د افغانستان او منځنۍ اسیا د امن او ثبات په اړه د دواړو بنسټونو مشورتي ناسته خورا مهمه موضوع ده.
د دوی په وینا، که د داسې ستونزو د هواري لپاره په سیمه ییزه او نړیواله کچه همغږي موجوده وي، نو هېڅ ستونزه به نا حل شوې پاتې نه شي.
د سیاسي چارو شنونکی سمیر انګار وايي: « دا غونډه د سیمې لپاره ځکه ډېره مهمه ده چې د شانګهای سازمان او د ملګرو ملتونو ګډ تعامل د سیمې ثبات لا پیاوړتیا سبب کېږي؛ همدارنګه د افغانستان لپاره هم یو نوی باب پرانستل کېږي، ترڅو سیمه ییز اتصال رامنځته شي، سیمه ییزې اقتصادي همکارۍ لا پیاوړې شي، په سیمه کې یو تلپاتې ثبات ټینګ شي او نوی نظم رامنځته شي.»
د شانګهای همکاریو سازمان زیاته کړې چې د سلا مشورې یاده ناسته په رغنده فضا کې ترسره شوې او د دواړو سازمانونو د دارالانشاګانو ترمنځ اړیکې لا هم د هغې ګډې همکارۍ د اعلامیې پر بنسټ روانې دي چې په ۲۰۱۰ کال کې د تاشکند په ښار کې لاسلیک شوې وه.
د شنونکو په خبره، که چېرې د دوی د سلامشورو پر بنسټ اقدامات ترسره شي، نو په افغانستان او سیمه کې به اکثریت ستونزې هوارې شي.
